Koordinatori i këshilltarëve të opozitës në Këshillin Komunal të Tetovës, Murat Murati, ka akuzuar kryetarin e Komunës së Tetovës, Bilall Kasami, se po përgatitet të privatizojë parkingjet publike në qytet informon Tetovasot.

Përmes një postimi në Facebook, Murati thotë se në Këshillin Komunal është propozuar një vendim i ri, sipas të cilit parkingjet publike do të jepen në shfrytëzim dhe menaxhim përmes koncesionit ose partneritetit publik-privat.

Sipas tij, kjo nënkupton se një shërbim publik dhe të ardhurat nga parkimi mund të kalojnë në duart e një operatori privat.

“Duke qenë se parkingjet publike janë pasuri e qytetarëve, konsideroj se ata meritojnë përgjigje të qarta. Pse po zgjidhet ky model? Kush do të përfitojë nga ky model? Cilat janë garancitë se çmimet nuk do të rriten dhe se interesi publik do të mbrohet?”, shkruan Murati.

Ai kërkon që përpara marrjes së një vendimi të tillë të zhvillohet debat publik, të ketë transparencë të plotë dhe llogaridhënie ndaj qytetarëve.

Sipas Muratit, çdo vendim që prek pronën dhe shërbimet publike duhet të merret vetëm pasi qytetarët të informohen dhe të dëgjohet zëri i tyre.Tetovasot