Kërçovë – Gjatë periudhës nga 31 maji 2025 deri më 31 maj 2026, Komuna e Kërçovës ka paguar gjithsej 2.739.493 denarë (rreth 44.500 euro) për shpenzimet e avokatëve që kanë përfaqësuar qytetarët e sulmuar nga qentë endacakë. Të dhënat janë siguruar nga TV Uskana përmes kërkesës për qasje në informata me karakter publik.

Nga shuma e përgjithshme, 578.857 denarë (rreth 9.400 euro) janë paguar në procedurat përmbarimore, ndërsa 2.160.636 denarë (rreth 35 mijë euro) janë paguar në bazë të aktgjykimeve gjyqësore.

Këto shifra tregojnë se problemi i qenve endacakë vazhdon të rëndojë buxhetin e Komunës së Kërçovës, jo vetëm përmes kompensimeve ndaj qytetarëve të dëmtuar, por edhe përmes kostove të procedurave ligjore.

Lidhur me masat për zgjidhjen e këtij problemi, Komuna e Kërçovës në përgjigjen për TV Uskana thekson se deri më tani janë ndërmarrë aktivitete për kapjen e qenve endacakë, trajtimin profesional dhe kujdesin e tyre në përputhje me rregulloret ligjore.

Po ashtu, Komuna njofton se gjatë këtij viti planifikohet ndërtimi i një strehimoreje për qentë endacakë, ndërsa procedura për realizimin e këtij projekti është në zhvillim. Sipas Komunës, me ndërtimin e strehimores pritet të krijohen kushte për një qasje më humane dhe më sistematike në zgjidhjen e problemit me qentë endacakë