Në pistën e kazermës „Goce Dellçev“ në Komunën e Aerodromit u zhvillua rreshtimi i zjarrfikësve vullnetarë nga të gjitha shoqatat aktive vullnetare të zjarrfikësve në Maqedoni.

Me këtë rreshtim u përcaktua numri real i zjarrfikësve vullnetarë të cilët janë të gatshëm të marrin pjesë në mënyrë të organizuar në shuarjen e zjarreve verore në hapësira të hapura, si pjesë e Ekipeve për Reagim të Shpejtë të Drejtorisë për Mbrojtje dhe Shpëtim.

Para zjarrfikësve vullnetarë foli drejtori i Drejtorisë për Mbrojtje dhe Shpëtim dhe komandanti i Forcave për Mbrojtje dhe Shpëtim, Stojançe Angellov, i cili prezantoi planet dhe pritshmëritë për sezonin e ardhshëm të zjarreve. Gjithashtu u prezantua struktura e re e brendshme dhe hierarkia, me qëllim koordinim, komandim dhe përfshirje më efikase të zjarrfikësve vullnetarë në sistemin për shuarjen e zjarreve.

“Që nga sot, opinioni publik do ta dijë edhe më qartë se ju jeni një forcë serioze dhe e respektueshme! Jam thellësisht i bindur se të gjithë së bashku do të fitojmë edhe më shumë mirënjohje dhe mbështetje nga publiku! Që nga sot, edhe njerëzit nga komuniteti i biznesit maqedonas, por edhe nga diaspora maqedonase, do ta dinë se ju jeni një forcë serioze dhe e respektueshme. Besoj se disa prej tyre, me ndjenjën e përgjegjësisë ndaj atdheut, do të ndihmojnë në pajisjen ose përmirësimin e pajisjeve tuaja me lloje të ndryshme të mjeteve kundër zjarrit. Ndërkohë, kërkoj që të respektoni parimin tim themelor: ‘Siguria para së gjithash!’ Siguria juaj gjithmonë duhet të jetë në vend të parë! Jetët tona mund të rrezikohen vetëm atëherë kur shpëtojmë jetë të tjera njerëzore! Sepse pemë, shkurre dhe bar të rinj përsëri do të rriten, shtëpitë e djegura përsëri do të ndërtohen, por jeta e humbur nuk mund të kthehet më. Siguria para së gjithash!”, tha Angellov.

Pas përfundimit të rreshtimit u mbajt një takim pune në ambient të hapur, ku zjarrfikësit vullnetarë shkëmbyen përvoja, mendime dhe propozime për funksionim më të mirë të sistemit të mbrojtjes dhe shpëtimit gjatë sezonit veror.