Ideja se e diela mbrëma do të jetë “vallëzimi i fundit” i Lionel Messit krijon tashmë një ndjenjë melankolie.

Kanë kaluar gati 21 vite që nga 17 gushti 2005, dita kur “Pleshti” debutoi me Argjentinën, duke nisur një histori dashurie plot me suksese, por edhe me momente zhgënjimesh.

Në vitin 2016, një nga zhgënjimet më të mëdha ishte finalja e “Copa América” kundër Kilit, e humbur me penallti, ku edhe Messi gaboi nga pika e bardhë. Pas kësaj, ai tha: “Vendimi është marrë. Kam bërë gjithçka për të fituar diçka, por nuk ia dola. Koha ime mbaroi,” çka hapi një mori debatesh mes tifozëve argjentinas. Rrjetet sociale ishin të tejmbushura me krahasime mes tij dhe Maradonës; shumë besonin se “Diego nuk do ta kishte lënë ekipin.” Megjithatë, “tërheqja” zgjati vetëm disa muaj. Messi ndryshoi mendim pas këshillës së Maradonës, i cili tha: “Ai duhet të qëndrojë. E kanë lënë vetëm dhe nuk dua që ta lënë vetëm.” Situata ndryshoi pas eliminimit në Kupën e Botës Rusi 2018, që ndryshoi përgjithmonë marrëdhënien e Messit me ekipin kombëtar. “Pleshti” filloi të përgjigjej ndaj kritikëve dhe në 2021 udhëhoqi ekipin drejt fitores në “Copa América”, duke i dhënë fund një periudhe të gjatë pa trofe që nga 1993.

Shpallja kampion bote në vitin 2022 me Argjentinën vulosi trashëgiminë e tij: Messi u bë heroi i kombit të tij dhe për shumëkënd, lojtari më i madh. Aktualisht, Messi vazhdon të mahnit me paraqitjet e tij të shkëlqyera, dhe turneu i Kupës së Botës e dëshmon këtë.

Ai ka realizuar 8 gola dhe ka dhënë 4 asistime, duke kontribuar në çdo ndeshje të turneut.

Në gjysmëfinale kundër Anglisë, ai theu shumë rekorde, dhe të dielën do të kërkojë të tejkalojë Maradonën, i cili fitoi një Kupë Bote në 1986.

Në përfundim, finalja mund të jetë kapitulli i fundit brilant i historisë së Mesit me Argjentinën, por pavarësisht rezultatit, ai tashmë është një ikonë. Dhe të mendosh që dhjetë vite më parë, ai donte të largohej…/abcnews.al