E shtuna, tradicionalisht dita e tregut në Kërçovë, ka sjellë një atmosferë më të gjallë falë ardhjes së mërgimtarëve për pushimet verore. Tregu i Gjelbër u vizitua nga një numër i madh qytetarësh, të cilët shfrytëzuan rastin për të blerë produkte të freskëta dhe mallra të ndryshme.
Ekipi i TV Uskana ishte në terren dhe bisedoi me tregtarë dhe qytetarë për gjendjen në treg. Një pjesë e tregtarëve u shprehën pjesërisht të kënaqur me qarkullimin, duke theksuar se ardhja e mërgimtarëve ka ndikuar pozitivisht në shtimin e blerësve. Sipas tyre, çmimet janë të përballueshme për blersit.

Nga ana tjetër, disa qytetarë kishin mendim ndryshe. Ata u ankuan se çmimet e disa produkteve janë rritur dhe se blerjet në treg nuk janë më aq të lira sa më parë.

Përveç çmimeve, si tregtarët ashtu edhe qytetarët ngritën shqetësime për kushtet në të cilat funksionon tregu. Ata kërkuan investime për përmirësimin e infrastrukturës, më shumë pastërti, organizim më të mirë dhe krijimin e kushteve më dinjitoze si për shitësit, ashtu edhe për blerësit.