Ditë më parë, TV Uskana raportoi për mosfunksionimin e ndriçimit publik në rrugën "Rudniçka", në segmentin nga NP "Komunalec" deri te "Pucko Petrol", në rrugën "Goce Dellçev", nga ish-"Agrokop" deri te SHFK "Sande Shterjoski", si dhe në rrugën "Ljubica Bogoeska". Pas interesimit të TV Uskana, Komuna e Kërçovës sqaroi se ndërprerja e ndriçimit ishte shkaktuar nga një defekt teknik, ndërsa ekipet kompetente ishin angazhuar për sanimin e tij. Ndërkohë, komuna ka përfunduar me sukses ndërhyrjen në terren dhe defekti është eliminuar. Që nga sonte, ndriçimi publik është rikthyer në funksion në të gjitha rrugët e lartpërmendura. Me rikthimin e ndriçimit, qytetarët tashmë mund t'i shfrytëzojnë këto rrugë në kushte më të sigurta gjatë orëve të mbrëmjes, ndërsa normalizohet edhe funksionimi i një shërbimi të rëndësishëm publik.