Komuna e Gostivarit njoftoi se së bashku me Shtabin e Krizës në nivel qendror dhe lokal, si dhe me NP “Ujësjellësi dhe Kanalizimi – Shkup”, po zhvillon aktivitete intensive në terren për normalizimin e gjendjes së sistemit të ujësjellësit, transmeton Portalb.mk.

Komuna apelon qytetarët që të informohen vetëm përmes njoftimeve zyrtare të institucioneve kompetente dhe të mos përhapin apo t’u besojnë informacioneve të pasakta që qarkullojnë në rrjetet sociale.

“Komuna e Gostivarit, Shtabi i Krizës në nivel qendror dhe lokal, si dhe NP ‘Ujësjellësi dhe Kanalizimi – Shkup’, po punojnë intensivisht në terren për normalizimin e gjendjes së sistemit të ujësjellësit. I ftojmë qytetarët që, lidhur me ecurinë e procesit, të informohen vetëm përmes njoftimeve zyrtare të institucioneve kompetente dhe të mos përhapin apo të mos mbështeten në informacione të rreme që qarkullojnë në rrjetet sociale”, thuhet në njoftim.

Komuna bën të ditur se qytetarët do të informohen me kohë për çdo zhvillim të ri, përfshirë rezultatet e analizave të cilësisë së ujit dhe gjendjen e sistemit të ujësjellësit.

Ndryshe, në Gostivar është shpallur epidemi të problemeve gastrointestinale, pas paraqitjes së numrit të lartë të i qytetarëve me simptoma si diarre, të vjella dhe dehidratim.

Kujtojmë se me propozim të Prokurorisë, Gjykata Penale në Gostivar shqiptoi 30 ditë paraburgim për tre të dyshuarve për ndotjen e ujit në sistemin e ujësjellësit në Gostivar. Gjykatësja Dragoslada Veselinova tha se duke pasur parasysh dënimin e paraparë me ligj që iu ngarkohet të dyshuarve sanksionohet me të paktën 4 vjet burg, ndërsa, shtoi ajo nëse lihen të mbrohen në liri, ekziston rreziku që ata të arratisen ose të ndikojnë te dëshmitarët.

Inspektorët e Agjencisë për Ushqim dhe Veterinari, së bashku me policinë dhe përfaqësues të Ministrisë së Mjedisit, konstatuan se në tubacionin kryesor ishte vendosur në mënyrë të paligjshme një pompë që fuste drejtpërdrejt ujë nga lumi Vardar. Kontrolli u krye pas njoftimit të prokurorit publik për shkak të dyshimeve se uji ishte ndotur, pas ankesave të qytetarëve. Më pas, uji u ndalua për pirje.

Prokuroria Publike më 20 korrik shpalli rezultatet e analizave, të cilat treguan se në ujë kishte pasur 48 herë më shumë baktere se vlerat e lejuara.