Pa ujë të sigurt, me mijëra qytetarë që vuajnë nga probleme në stomak dhe me shpresën se situata do të stabilizohet sa më shpejt, Gostivari po e kalon ditën e pestë që nga shpallja e epidemisë në qytet. Epidemia u shpall pas skandalit me rrjetin e ujësjellësit të qytetit, pasi u zbulua se në të depërtonin ujëra të ndotura dhe se uji përmbante baktere koliforme, të cilat zakonisht jetojnë në zorrët e njerëzve dhe kafshëve me gjak të ngrohtë. Një prej përfaqësuesve të tyre është Escherichia coli (E. coli). Me fjalë të tjera, uji që vinte nga çezmat në shtëpitë e banorëve të Gostivarit ishte i kontaminuar, më së shpeshti me ndotje të lidhur me fekale ose ujëra të zeza, siç dyshojnë edhe organet hetimore, shkruan Kolegium.mk, transmeton Portalb.mk.
Sipas informacioneve të fundit nga Shtabi Qendror i Krizës, ka filluar hiperklorimi i ujit dhe shpëlarja e rrjetit primar të ujësjellësit, si pjesë e masave për përballimin e epidemisë.
Është pastruar edhe burimi i ujit.
Pritjet, të cilat i ndau dje edhe kryeministri Hristijan Mickoski, janë që deri në fund të javës uji në Gostivar të jetë teknikisht i rregullt, ndërsa nga fundi i javës së ardhshme të jetë i sigurt edhe për pije, natyrisht nëse gjithçka zhvillohet sipas planit.
Për ta rikthyer sa më shpejt furnizimin me ujë të sigurt, po ndihmojnë edhe ekspertë nga Ndërmarrja Publike “Ujësjellësi dhe Kanalizimi” nga Shkupi.
Ndërkohë, në 13 lokacione në qytet janë vendosur pika ku qytetarët mund të furnizohen me ujë teknik.
Sa i përket ujit të pijshëm, pas donacioneve dhe solidaritetit të qytetarëve, Qeveria ka filluar të dërgojë cisterna me ujë, si dhe ujë të ambalazhuar.
Drejtori i Drejtorisë për Mbrojtje dhe Shpëtim (DMSh), Stojançe Angellov, njoftoi se në Gostivar janë dërguar 200 mijë litra ujë të ambalazhuar, donacion nga Ministria e Vetëqeverisjes Lokale dhe Komuna e Negotinës.
Sa i përket gjendjes shëndetësore të qytetarëve të Gostivarit, informacionet e fundit nga autoritetet shëndetësore tregojnë se numri i personave me probleme në stomak është stabilizuar dhe nuk ka shtrime të reja në spital.
Ministri i Shëndetësisë, Sasho Klekovski, u bëri thirrje qytetarëve t’i respektojnë masat dhe të mos relaksohen derisa të përfundojnë ndërhyrjet në sistemin e ujësjellësit, pasi, sipas tij, që nga e hëna rezultatet tregojnë katër pika të pastra dhe pesë të kontaminuara. Për këtë arsye, masat parandaluese duhet të mbeten në fuqi, edhe pse numri i rasteve është në rënie.
Deri më tani, mbi 3.000 pacientë kanë kërkuar ndihmë mjekësore në Gostivar për shkak të dhimbjeve në stomak dhe simptomave si temperaturë dhe diarre.
Për monitorimin e situatës në terren, inspektorët e Agjencisë së Ushqimit dhe Veterinarisë (AUV) vazhdojnë kontrollet intensive në Gostivar. Vetëm të martën, sipas njoftimit të AUV-së, janë kryer 70 kontrolle në bare, restorante, piceri, sanduiçeri dhe objekte të tjera gastronomike.
“Te operatorët nuk janë konstatuar shkelje në këtë aspekt. Për shërbimin dhe larjen e enëve, sipërfaqeve të punës dhe pajisjeve është respektuar ndalesa dhe është përdorur ujë i ambalazhuar ose ujë i sigurt gjatë proceseve të punës. Për shërbimin e mysafirëve në objektet gastronomike është konstatuar se përdoren gota dhe enë plastike ose letre”, njoftoi AUV.
Megjithatë, janë konstatuar parregullsi të tjera, si mungesa e dezinfektimit, dezinsektimit dhe deratizimit në pesë lokale; në 18 objekte punonjësit nuk kishin kryer kontrollet e detyrueshme shëndetësore, ndërsa 11 kompani nuk ishin fare të regjistruara si operatorë ushqimorë, megjithëse ushtronin këtë veprimtari.
Në dy objekte u zbulua edhe 18 kilogramë ushqim i pasigurt, përfshirë virshlle, kos të thartë, jogurt, sallam dhe gjalpë.
Për parregullsitë e konstatuara, AUV-ja ka shqiptuar masa ndëshkuese, përfshirë ndalesa për ushtrimin e veprimtarisë, vërejtje, si dhe 30 gjoba në vlerë totale prej 7.750 eurosh.
Përveç epidemisë, Qeveria shpalli edhe gjendje krize 30-ditore për menaxhimin e situatës në Gostivar.
Për rastin po zhvillohet edhe një hetim penal. Janë arrestuar drejtoresha e ndërmarrjes komunale lokale dhe dy bashkëpunëtorë të saj.
Skandali mori jehonë të madhe në opinion pas numrit të lartë të pacientëve që kërkuan ndihmë mjekësore.
Autoritetet kanë publikuar dyshime se ishin vendosur pompa përmes të cilave në gypin kryesor të ujësjellësit depërtonin ujëra të ndotura, me gjasë për të rritur presionin e ujit.
Rezultatet e analizave treguan se për tre javë në sistem ishte futur ujë me 48 herë më shumë baktere se niveli i lejuar.
Kujtojmë se me propozim të Prokurorisë, Gjykata Penale në Gostivar shqiptoi 30 ditë paraburgim për tre të dyshuarve për ndotjen e ujit në sistemin e ujësjellësit në Gostivar. Gjykatësja Dragoslada Veselinova tha se duke pasur parasysh dënimin e paraparë me ligj që iu ngarkohet të dyshuarve sanksionohet me të paktën 4 vjet burg, ndërsa, shtoi ajo nëse lihen të mbrohen në liri, ekziston rreziku që ata të arratisen ose të ndikojnë te dëshmitarët.
Inspektorët e Agjencisë për Ushqim dhe Veterinari, së bashku me policinë dhe përfaqësues të Ministrisë së Mjedisit, konstatuan se në tubacionin kryesor ishte vendosur në mënyrë të paligjshme një pompë që fuste drejtpërdrejt ujë nga lumi Vardar. Kontrolli u krye pas njoftimit të prokurorit publik për shkak të dyshimeve se uji ishte ndotur, pas ankesave të qytetarëve. Më pas, uji u ndalua për pirje.
Prokuroria Publike më 20 korrik shpalli rezultatet e analizave, të cilat treguan se në ujë kishte pasur 48 herë më shumë baktere se vlerat e lejuara.
