Vallja tradicionale e Tropojës u prezantua në skenën e Sanremos nga Azgan Haklaj dhe vajza e tij, Adela, në kuadër të manifestimit ndërkombëtar "Festa dei Popoli", ku morën pjesë përfaqësues nga 18 shtete.
Interpretimi i tyre u vlerësua si një moment i veçantë për promovimin e kulturës dhe trashëgimisë shqiptare në arenën ndërkombëtare. Përmes performancës së përbashkët, babë e bijë përcollën mesazhin e ruajtjes dhe përcjelljes së traditave nga një brez te tjetri, duke dëshmuar se kultura popullore shqiptare vazhdon të jetojë dhe të trashëgohet.
Të veshur me kostumet tradicionale të Malësisë së Gjakovës, Azgan dhe Adela Haklaj interpretuan me autenticitet kërcimin e Tropojës, duke ruajtur lëvizjet karakteristike dhe elementët burimorë të kësaj valleje. Performanca solli në skenën e Sanremos jo vetëm një interpretim artistik, por edhe historinë, identitetin dhe vlerat kulturore të trevës së Tropojës.
Pjesëmarrja në këtë aktivitet shumëkombësh përbën një tjetër promovim të rëndësishëm të folklorit shqiptar, duke e prezantuar atë para një publiku ndërkombëtar dhe duke dëshmuar pasurinë e traditave shqiptare.