Numri i viktimave nga tërmeti i fuqishëm që goditi jugperëndimin e Japonisë është rritur në 30, ka bërë të ditur të enjten kryeministrja Sanae Takaichi.

Tërmeti me magnitudë 6.8 goditi prefekturën Kumamoto në ishullin Kyushu të martën, duke shkaktuar dëme të mëdha në shtëpi dhe në rrjetin energjetik. Ekipet e shpëtimit janë ende në terren në kërkim të të mbijetuarve, raporton BBC.

Disa nga viktimat humbën jetën pasi një pjesë e një qendre tregtare u shemb, ndërsa rreth një orë më vonë një shpërthim goditi objektin.

Mijëra banorë të zhvendosur janë strehuar në qendra evakuimi, ku përballen me sfida të mëdha për shkak të temperaturave të larta. Parashikimet tregojnë se temperaturat mund të arrijnë deri në 39°C në ditët në vijim, ndërsa autoritetet kanë bërë thirrje për kujdes ndaj goditjes nga nxehtësia.

Ministri i Mbrojtjes i Japonisë, Shinjiro Koizumi, ka njoftuar dërgimin e 300 kondicionerëve në Kumamoto, prej të cilëve 150 do të vendosen në qendrat e evakuimit.

Rreth 9,000 persona janë strehuar në këto qendra, ndërsa mbi 30,000 familje kanë mbetur pa energji elektrike. Deri më tani janë regjistruar më shumë se 100 pasgoditje, duke bërë që shumë banorë të kalojnë natën në vetura nga frika e lëkundjeve të reja.