Kryetari i Komunës së Kërçovës, Aleksandar Jovanovski, gjatë prezantimit të projektit për ndërtimin e spitalit të ri, foli edhe për të ardhmen e objektit të papërfunduar që për më shumë se 30 vjet ishte planifikuar të shërbente si spitali i ri i qytetit.
Sipas Jovanovskit, pas kryerjes së ekspertizës teknike dhe vlerësimit të gjendjes së objektit, një pjesë e hapësirave pritet të përshtatet për kujdesin ndaj personave të moshuar, ndërsa pjesa tjetër do të dedikohet për ofrimin e shërbimeve për fëmijët me nevoja të veçanta.
Ai theksoi se nevoja për një qendër të tillë është e madhe, pasi në rajonin e Kërçovës jetojnë shumë të moshuar që jetojnë vetëm dhe kanë nevojë për kujdes profesional dhe mbështetje të vazhdueshme.
"Në rajonin e Kërçovës kemi një numër të madh të moshuarish që jetojnë vetëm dhe kanë nevojë për kujdes profesional. Për këtë arsye, mendojmë që një pjesë e objektit, i cili ishte paraparë të shërbente si spital i ri, të përshtatet për akomodimin dhe trajtimin e tyre. Një pjesë tjetër e hapësirave do të vihet në shërbim të fëmijëve me nevoja të veçanta, të cilëve gjithashtu u nevojiten kushte dhe shërbime të specializuara," deklaroi kryetari i Komunës së Kërçovës, Aleksandar Jovanovski.
Ky propozim synon t'i japë një funksion të ri objektit shumëvjeçar të papërfunduar, duke e shndërruar atë në një qendër që do t'u shërbejë kategorive më të ndjeshme të shoqërisë dhe do të plotësojë një pjesë të nevojave sociale në komunë.