Komuna e Kërçovës ka ndaluar përdorimin e ujit për pije nga disa çezma publike dhe ujësjellës lokalë, pas rezultateve të analizave laboratorike të kryera nga institucionet kompetente. Megjithatë, qytetarët që furnizohen nga ujësjellësi i qytetit nuk kanë arsye për shqetësim, pasi sipas NP Komunalec, uji që vjen nga burimi Studençica është 100 për qind i pastër, i kontrolluar dhe i sigurt për konsum.
Ndalimi, i vendosur nga Agjencia për Ushqim dhe Veterinari, nuk përfshin ujësjellësin e qytetit, por vlen vetëm për disa pika të veçanta të furnizimit me ujë që nuk janë të lidhura me sistemin e ujësjellësit të Studençicës.
Sipas njoftimit, ndalimi përfshin:
Garanë – ujësjellësi i fshatit (çezma pranë xhamisë);
Drugovë – çezma pranë rrugës (te objekti ndarës);
Kërçovë – çezma publike “Bela Kulla”;
Strellcë – ujësjellësi i fshatit (pranë shkollës “Milto Gura”);
Shutovë – ujësjellësi i fshatit (pikëmatja “Milto Gura”);
Premkë – ujësjellësi i fshatit (në qendër të fshatit).
Autoritetet u bëjnë thirrje qytetarëve që të mos përdorin për pije ujin nga këto pika deri në një njoftim të ri, ndërsa furnizimi me ujë nga ujësjellësi i qytetit vazhdon normalisht dhe mbetet i sigurt për konsum.