Mijëra të rinj u mblodhën në Prishtinë për natën e parë të Sunny Hill Festival, ku ylli amerikan i muzikës pop, Katy Perry, dhuroi një performancë spektakolare që u shndërrua në një nga momentet më të komentueshme të festivalit.

Artistja u ngjit në skenë me një kostum astronauti, ndërsa gjatë performancës akrobatët i dorëzuan flamurin e Kosovës. Në një skenografi simbolike, Perry e vendosi flamurin në një instalacion që paraqiste Hënën, moment që u prit me duartrokitje dhe entuziazëm nga mijëra të pranishmit.

“Përshëndetje Prishtinë. A jeni shqiptarë, a do të festoni me mua?”, ishte përshëndetja e parë e këngëtares, ndërsa publiku e shoqëroi duke kënduar hitet e saj gjatë gjithë koncertit.

Një tjetër moment emocionues ishte ngjitja në skenë e një vajze 10-vjeçare, ndërsa Katy Perry shfrytëzoi rastin për të falënderuar Dua Lipën për ftesën në festival.

“Mikja ime Dua Lipa më ka thënë se ky është festivali më i mirë në Europë dhe kam gjithë verën që pres këtë moment”, u shpreh artistja para publikut.

Përpara performancës së Katy Perryt, skenën e ndezi këngëtarja shqiptare Dhurata Dora, e cila u prit me ovacione nga publiku.

Sunny Hill Festival vijon edhe gjatë fundjavës me emra të njohur të muzikës botërore, mes tyre Lewis Capaldi dhe Martin Garrix. Në Prishtinë ndodhet edhe themeluesja dhe organizatorja e festivalit, Dua Lipa, e cila edhe këtë vit ka sjellë në Kosovë një nga ngjarjet më të mëdha muzikore në rajon.