Mbrojtësi i Kombëtares shqiptare, Mario Mitaj, është zyrtarisht futbollist i Genoas. 22-vjeçari rikthehet në futbollin europian pas eksperiencës me Al Ittihad në Arabinë Saudite, duke firmosur me klubin italian që drejtohet nga Daniele De Rossi.

Sipas mediave italiane, transferimi është realizuar në formën e huazimit për një sezon, për të cilin Genoa ka paguar 2 milionë euro. Klubi italian do të ketë gjithashtu të drejtën e blerjes përfundimtare të kartonit të lojtarit për 4.5 milionë euro të tjera.

Gjatë prezantimit, Mitaj shprehu entuziazmin për këtë hap të rëndësishëm në karrierën e tij.

“Të bashkohesha me një klub si Genoa dhe të luaja në një kampionat si Serie A ishte një objektiv për mua. Kam shumë dëshirë të nis punën në një ambient që ofron motivim të madh”, u shpreh mbrojtësi kuqezi në një video të publikuar nga klubi.

Në njoftimin zyrtar, Genoa vlerëson eksperiencën e futbollistit shqiptar, duke kujtuar se Mitaj është produkt i akademisë së AEK Athinës dhe numëron 32 paraqitje me Kombëtaren e Shqipërisë, përfshirë pjesëmarrjen në Euro 2024.

22-vjeçari ka zhvilluar 142 ndeshje në kampionatet e Greqisë, Rusisë dhe Arabisë Saudite, si edhe në kompeticionet vendase e ndërkombëtare. Gjatë aventurës me Al Ittihad, ai fitoi kampionatin dhe Kupën e Mbretit në sezonin 2024/2025.