Një taksist nga rrethina e Tetovës dje është sjellur në mënyrë të pahijshme me dy vajza të reja të cilat në vend se t’i dërgonte në fshatin Përshefcë, i futi në fshatin Leshkë ku ka shfaqur gjeste të papërshtatshme, ndërsa vajzat kërcyen nga vetura, raporton Portalb.mk.

Policia informoi se më 04.08.2026 në ora 16:30 në Stacionin Policor Tearcë, D.Q. ka denoncuar se e dashura e tij E.I.(20) dhe shoqja e saj 16-vjeçare, të dyja nga fshati Përshefcë e Tetovës, derisa ishin në një automjet taksi, shoferi ka filluar të sillet në mënyrë të papërshtatshme, nuk e ka ndalur automjetin dhe nuk i ka dërguar në lokacionin e kërkuar.

“Sipas denoncimit, ato kanë arritur të kërcejnë nga automjeti në lëvizje dhe kanë kërkuar ndihmë”, thanë nga SPB Tetovë.

Policia në njoftimin e saj nuk i ka treguar inicialet e shoferit dhe moshën.

Me taksistin është kryer bisedë informative.

Për rastin është njoftuar prokurori publik dhe Qendra për Punë Sociale në Tetovë ndërsa po ndërmerren masa për zbardhjen e ngjarjes.