Frank Beard, bateristi i grupit legjendar amerikan ZZ Top, është ndarë nga jeta në moshën 77-vjeçare.

Muzikanti ka ndërruar jetë të martën, më 18 gusht, në fermën e tij në Richmond të Teksasit, i rrethuar nga familjarët.

Beard ishte pjesë e ZZ Top që nga formimi i grupit në vitin 1969 dhe për më shumë se pesë dekada qëndroi në formacionin origjinal, së bashku me Billy Gibbons dhe Dusty Hill.

ZZ Top u shndërrua në një prej grupeve më të suksesshme të rokut amerikan, duke shitur mbi 50 milionë disqe në mbarë botën. Grupi u bë i famshëm me këngë si “Sharp Dressed Man” dhe “Legs”, ndërsa stili karakteristik i muzikës dhe imazhi i tyre i veçantë i kthyen në një ikonë të rokut edhe në Hollyëood.

Pas lajmit për vdekjen e Beard, Billy Gibbons dhe basisti Elëood Francis, i cili zëvendësoi Dusty Hill pas vdekjes së tij në vitin 2021, ndanë një mesazh prekës për muzikantin.

Ata e cilësuan Beard si një mik të madh, bashkëpunëtor të rëndësishëm dhe një prej bateristëve më inovativë, duke theksuar se ritmi i tij ishte një nga elementët që ndihmoi ZZ Top të qëndronte në majat e muzikës rok.

Vdekja e Beard ka sjellë edhe ndryshime në axhendën e grupit. ZZ Top ka anuluar dy koncertet e ardhshme, në Salt Lake City dhe Colorado Springs. Grupi pritet të rikthehet në skenë këtë fundjavë në Austin City Limits, ku do të zhvillojë dy koncerte në kuadër të turneut “The Big One!”.