Në “Loro Boriçi” u regjistruan 4 gola, penallti dhe karton i kuq për një duel që i kishte të gjitha. Korçarët evituan humbjen, edhe pse në disavantazhin e dy golave dhe me skuadër të “përgjysmuar”.

Skënderbeu e ka nisur me një surprizë sezonin e ri të Kategorisë Superiore, duke marrë një pikë në transfertën ndaj Vllaznisë në një ndeshje spektakolare të mbyllur 2-2. Korçarët udhëtuan drejt Shkodrës me një skuadër të “përgjysmuar”, pasi merkato e klubit është e bllokuar nga FIFA dhe nuk mund të aktivizonte afrimet e reja të verës.

Pavarësisht kësaj, Skënderbeu zhvilloi një ndeshje të guximshme dhe krijoi disa mundësi të rrezikshme, veçanërisht përmes Nasr. Pjesa e dytë solli një shpërthim golash. Bekim Balaj realizoi dy herë brenda vetëm katër minutash, në minutat 50 dhe 54, ku në episodin e dytë e dërgoi topin në rrjetë nga pika e penalltisë. Por, Vllaznia nuk arriti të menaxhonte avantazhin e rëndësishëm që i dha kapiteni.

Reagimi i korçarëve ishte i menjëhershëm, me Janaqin që shënoi në minutën e 57-të me një goditje të fuqishme nga distanca. Miqtë vijuan të kërkonin golin e barazimit dhe përpjekjet e tyre u shpërblyen në minutën e 75-të. Bismark, i aktivizuar edhe në mbrojtje, dërgoi topin në rrjetë për 2-2 dhe vulosi një pikë të rëndësishme për Skënderbeun.

Në fund, sfida pati edhe një tjetër episod. Dulis u ndëshkua me karton të kuq, duke lënë Vllazninë me 10 lojtarë për minutat e fundit. Barazimi nuk ndryshoi më dhe Skënderbeu festoi një pikë të vlefshme në ndeshjen hapëse të kampionatit.