Rreth 40 minuta deri në një orë është koha e pritjes për hyrje dhe dalje nga shteti në pikën kufitare „Tabanoc“ në kufirin Maqedoni-Serbi, ndërsa situatë identike me pritjen për dalje nga shteti është edhe në pikën kufitare „Bogorodicë“ me Greqinë, informuan nga Lidhja Auto-Moto e Maqedonisë (LAMM), njofton Portalb.mk.

Informacioni i LAMM-së është përfundimisht me orën 6 të mëngjesit, por nga kamerat e Ndërmarrjes Publike për Rrugë Shtetërore (NPRRSH), të cilat në kohë reale tregojnë gjendjen në pikat kufitare, mund të vërehen kolona të gjata në PK „Bogorodicë“ edhe pas orës 9. Nga ana tjetër, në PK „Tabanoc“, sipas pamjeve, gjendja pas orës 9 ka ndryshuar dhe mund të vërehet vetëm një numër i vogël automjetesh.

Në pikat e tjera kufitare, siç njoftojnë nga LAMM, nuk ka pritje më të gjata për hyrje dhe dalje nga shteti.

Nga atje thonë se intensiteti i trafikut në rrugët jashtë mjediseve urbane është rritur, por po zhvillohet pa pengesa, në rrugë të thata.

Nga Lidhja Auto-Moto e Maqedonisë rekomandojnë shpejtësi të përshtatur të lëvizjes, respektim të sinjalizistikës së vendosur rrugore dhe drejtim të kujdesshëm të automjeteve, veçanërisht në rrugët që kalojnë nëpër lugina e gryka rrugore ku ekziston mundësia e rrëshqitjes së dheut. Kjo vlen veçanërisht për akset Katllanovë-Veles, Mavrovë-Dibër-Strugë, Vinicë-Berovë dhe Koçan-Dellçevë.