Profesorja universitare dhe analistja Ana Çupeska paralajmëron për një rrjet të koordinuar interesash që, sipas saj, po thurret në vend përmes tri sektorëve kyç: mediave, energjetikës dhe financave. Ajo apelon se rezistenca ndaj këtyre rrjedhave të dyshimta duhet të zhvillohet në disa nivele, përfshirë edhe veprime konkrete operative.

Paralajmërim për lojtarë të rinj mediatikë nga „bota serbe“

Çupeska thekson spekulimet për hyrjen e afërt të subjekteve të reja mediatike në hapësirën mediatike maqedonase. Bëhet fjalë për media të lidhura ngushtë me tregun serb, përkatësisht televizionin „Euronews Serbia“ dhe median e shkruar „Alo Srbija“.

Sipas saj, ky veprim nuk është i rastësishëm dhe paraqet një përpjekje për zgjerimin e ndikimeve, ndaj të cilave kërkohet një reagim serioz shoqëror.

Bizneset energjetike: eksport, pastaj import i energjisë elektrike

Përveç ofensivës mediatike, Çupeska ngre pikëpyetje edhe për zhvillimet në sektorin energjetik, duke përmendur edhe emra konkretë.

Ajo përmend Dušan Adamoviqin, konsull dhe përfaqësues special, i cili, sipas informacioneve të saj, ka rol kyç në rrjedhat energjetike.

„Rezistenca në atë linjë duhet të jetë në një nivel, ndërsa në një nivel tjetër duhet të ketë edhe veprime operative… Pastaj, në një nivel tjetër kemi këtë Dušan Adamoviqin, konsullin, përfaqësuesin special, i cili me sa duket merret shumë me bizneset energjetike, me eksportin e energjisë elektrike dhe më pas me importin e po asaj energjie elektrike këtu“, thekson Çupeska në paraqitjen e saj.

Kredia hungareze si pjesë e mozaikut

Ky rrjet interesash politike dhe biznesi, vlerëson analistja, plotësohet edhe nga financat, më konkretisht nga kredia aktuale hungareze.

Duke iu referuar diskutimit në të cilin u përmendën këto fonde, Çupeska paralajmëron se paratë nga kredia hungareze nuk duhet të shihen të izoluara.

„Paratë tani i përmendi Xhelali, nga kredia hungareze… Këtu me sa duket ka një qark që duhet ndjekur. Mediat duhet ta ndjekin dhe të gjitha këto si një paketë“, shprehet ajo.

Deklarata e saj është një apel i drejtpërdrejtë për opinionin publik dhe gazetarët hulumtues që këto tri elemente – mediat, energjetika dhe borxhet shtetërore – të mos trajtohen si raste të ndara, por të ndiqet me vëmendje gjurma e parave dhe ndikimeve që ndërthuren në një paketë të vetme. (lajmpress.org)