Një tjetër dron dhe një sasi eksplozivi të nivelit ushtarak janë zbuluar pranë aeroportit Leipzig-Halle në Gjermani, pak ditë pas një incidenti të dyshuar me dronë që përfshiu një avion mallrash të DHL. Sipas mediave gjermane NDR, WDR dhe Süddeutsche Zeitung, droni i tretë u gjet më 14 gusht në Kampelsketal, në një zonë fushore pranë pjesës perëndimore të aeroportit. Dyshohet se pajisja ishte planifikuar për të sulmuar avionë mallrash ukrainas, por nuk kishte funksionuar.

Në vendngjarje u gjetën gjithashtu rreth 50 gramë Hexogen, i njohur edhe si T4, një material shumë shpërthyes që përdoret kryesisht në fushën ushtarake. Një dron i parë i pajisur me eksploziv ishte zbuluar më 4 gusht mes avionëve ukrainas të mallrave në aeroport. Detonatori ishte i dëmtuar dhe dyshohet se kjo pengoi shpërthimin. Po atë mbrëmje, një avion mallrash i DHL u përplas me një objekt të dyshimtë në ajër me shpejtësi prej disa qindra kilometrash në orë. Avioni pësoi dëme të kufizuara, por gjatë hetimeve nuk u gjetën mbetje të një droni. Për këtë arsye, autoritetet ende nuk e kanë konfirmuar nëse objekti ishte një dron apo diçka tjetër.

Pranë pistës, në fshatin e braktisur Kursdorf, policia zbuloi edhe një pajisje teknike që mund të jetë përdorur për kontrollin e dronëve. Prokuroria Federale gjermane e ka cilësuar ngjarjen si një “sulm serioz ndaj infrastrukturës së transportit dhe logjistikës së Gjermanisë”. Ministri i Brendshëm Federal Alexander Dobrindt ka folur për një të ashtuquajtur “skenar sulmi hibrid”, duke mos përjashtuar përfshirjen e aktorëve të huaj. Burime të sigurisë dyshojnë për përfshirje të mundshme të shërbimeve ruse të inteligjencës, ndërsa Moska i ka mohuar akuzat.