ChatGPT duhet t’i përmbahet rregullave të reja dhe më të ashpra të vendosura nga Bashkimi Europian, pasi është përfshirë nga Komisioni Europian në listën e platformave digjitale me ndikim të konsiderueshëm.

Kjo është hera e parë që një chatbot me inteligjencë artificiale përfshihet në këtë nivel rregullator. Në listë u shtuan gjithashtu forumi Reddit dhe platforma e lojërave Roblox. Ky vendim prek platformat që kanë mbi 45 milionë përdorues aktivë në muaj në 27 shtetet e Bashkimit Europian.

Të treja kompanitë kanë një afat katërmujor për të përmbushur kërkesat shtesë të parashikuara nga Akti i Shërbimeve Digjitale. Ato duhet të analizojnë dhe të menaxhojnë rreziqet sistemike që krijohen nga shërbimet dhe algoritmet e tyre. Kontrolli do të përfshijë përplasjen me ligjin për përmbajtje të paligjshme, ndikimet negative tek të miturit, shëndetin fizik e mendor të përdoruesve, të drejtat bazë, proceset zgjedhore dhe sigurinë e përgjithshme. Për ta vendosur nën këtë legjislacion, Komisioni Europian e ka kategorizuar ChatGPT-në si motor kërkimi. Ekspertët mendojnë se ky vendim vendos një precedent dhe mund të ndikojë mbi mënyrën e mbikëqyrjes së ardhshme të sistemeve të avancuara të inteligjencës artificiale gjeneruese.

Kjo masë miratohet teksa Brukseli intensifikon kontrollet ndaj korporatave të mëdha të teknologjisë, pavarësisht kundërshtimeve nga Shtetet e Bashkuara. Mosrespektimi i detyrimeve mund të ketë pasoja financiare të mëdha për platformat.