Në prani të familjarëve, miqve, kolegëve dhe dashamirëve, Dr. Qemal Rushiti ka mbrojtur me sukses disertacionin e doktoraturës, duke kurorëzuar me sukses një rrugëtim të gjatë akademik dhe shkencor.

Mbrojtja e disertacionit u zhvillua nën udhëheqjen e stafit akademik të Fakultetit të Shkencave të Mjekësisë, të kryesuar nga Dekani i Fakultetit të Mjekësisë pranë Universitetit “Shën Kirili dhe Metodi” në Shkup.

DR. QEMAL RUSHITI – KIRURG I NJOHUR

Dr. Qemal Rushiti është një nga mjekët më të respektuar të gjeneratës së re në Maqedoninë e Veriut, specialist i kirurgjisë digjestive dhe abdominale.

Emri i tij është pjesë e një kapitulli të rëndësishëm të historisë së shëndetësisë në vend, si pjesë e ekipit që realizoi transplantet e para të suksesshme të mëlçisë në Maqedoninë e Veriut.

Si profesionist i përkushtuar, humanist dhe edukator, ai gëzon respekt të madh si nga kolegët, ashtu edhe nga mijëra pacientë.

Arsimi dhe zhvillimi profesional

Rrugëtimin profesional e nisi në Fakultetin e Mjekësisë pranë Universitetit “Shën Kirili dhe Metodi” në Shkup, ku u diplomua me rezultate të larta.

Pas përfundimit të studimeve të mjekësisë së përgjithshme, u orientua drejt një prej fushave më komplekse dhe dinamike të mjekësisë – kirurgjisë abdominale.

Specializimin në kirurgjinë digjestive e përfundoi në fakultetin amë, pas së cilës u përfshi në praktikën klinike, duke vazhduar në mënyrë të pandërprerë avancimin e njohurive dhe aftësive të tij profesionale përmes trajnimeve dhe edukimeve në qendra prestigjioze mjekësore evropiane dhe botërore.

Pjesë e transplantimeve historike të mëlçisë

Dr. Rushiti është i punësuar në Klinikën Universitare të Kirurgjisë Digjestive në Shkup, ku në punën e përditshme përballet me patologjitë më të rënda të organeve abdominale dhe realizon ndërhyrje të ndërlikuara dhe urgjente kirurgjikale.

Një nga arritjet e tij më të rëndësishme profesionale erdhi në nëntor të vitit 2022 dhe gjatë vitit 2023, kur ishte pjesë e ekipit kirurgjik të udhëhequr nga prof. dr. Svetozar Antoviq dhe dr. Ljubomir Ognenoviq, i cili për herë të parë në historinë e Republikës së Maqedonisë së Veriut realizoi një transplant kompleks të mëlçisë nga një dhurues i ndjerë.

Ky sukses historik përbënte një hap të madh përpara për mjekësinë dhe shëndetësinë në vend, duke hapur një kapitull të ri në zhvillimin e transplantimit të organeve në Maqedoninë e Veriut.

Veprimtaria akademike dhe shkencore

Përveç punës së lodhshme në sallat e operacionit, Dr. Qemal Rushiti është i përkushtuar edhe ndaj shkencës dhe edukimit mjekësor.

Ai është zgjedhur asistent në Katedrën e Kirurgjisë pranë Fakultetit të Mjekësisë në Shkup, ku njohuritë dhe përvojën e tij praktike ua përcjell studentëve të mjekësisë dhe mjekëve specializantë.

Është autor dhe bashkautor i disa punimeve shkencore dhe publikimeve profesionale nga fusha e kirurgjisë abdominale, të prezantuara në kongrese vendore dhe ndërkombëtare.

Mirënjohje dhe kontribut shoqëror

Për kontributin e tij në zhvillimin e mjekësisë në vend, Dr. Rushiti dhe ekipi i tij kanë marrë disa mirënjohje të rëndësishme.

Në vitin 2023, ekipi i Kirurgjisë Digjestive u shpall “Ekipi i vitit” në manifestimin prestigjioz “Burrat e Vitit”, ndërsa suksesi i tyre u vlerësua publikisht edhe në manifestimin “Brumbulli i Artë i Popullaritetit”.

Në opinion, Dr. Qemal Rushiti njihet për modestinë, përkushtimin e jashtëzakonshëm ndaj pacientëve dhe qetësinë në momentet më kritike.

Karriera e tij profesionale është shembull se si puna e palodhur, përkushtimi, dija dhe avancimi i vazhdueshëm mund të çojnë drejt standardeve më të larta profesionale.

Krenaria e familjes

Qamil Rushiti, vëllai i Dr. Qemal Rushitit, shprehu krenarinë e tij për suksesin, duke theksuar rrugëtimin e gjatë dhe seriozitetin me të cilin ai i është përkushtuar profesionit dhe dijes.

“Doktoratura është një titull i madh, por për mua si vëlla, më e madhe se titulli është krenaria që ndiej për njeriun, vëllain dhe profesionistin që je”, thuhet në dedikimin kushtuar Dr. Rushitit.

Mbrojtja me sukses e disertacionit të doktoraturës përbën një tjetër hap të rëndësishëm në zhvillimin profesional dhe shkencor të Dr. Qemal Rushitit, por edhe një moment të veçantë krenarie për familjen, kolegët dhe të gjithë ata që kanë ndjekur rrugëtimin e tij në fushën e mjekësisë.