Një festë fetare është kthyer në tragjedi në Meksikë, pasi një shpërthim i fuqishëm fishekzjarresh pranë një kishe ka shkaktuar të paktën 10 viktima dhe mbi 60 të plagosur.

Ngjarja e rëndë ndodhi të shtunën në mbrëmje në komunitetin Santa Maria Cantada, në shtetin e Meksikës, gjatë festimeve për Ditën e Shenjtorëve Patronë.

Sipas autoriteteve, fishekzjarret i vunë flakën një ndërtese famullie që përdorej si depo për materialet piroteknike. Flakët më pas shkaktuan një shpërthim të fuqishëm, duke përhapur zjarrin në zonën ku po zhvilloheshin festimet.

https://twitter.com/i/status/2096643056241893492

Videot e publikuara nga mediat lokale tregojnë momentet e panikut, ndërsa dhjetëra persona ndodheshin në sheshin përpara kishës.

Sipas raportimeve, incidenti ndodhi gjatë një rituali tradicional me një strukturë në formën e “demit”, të ngarkuar me fishekzjarre. Banorët e kishin sjellë atë me një karrocë për ceremoninë festive.

Pas ndezjes së fishekzjarreve, flakët u përhapën dhe prekën materialet piroteknike të ruajtura në ndërtesën pranë kishës.

Shpërthimi shkaktoi kaos mes pjesëmarrësve. Njerëzit nisën të largoheshin me vrap nga sheshi, ndërsa ekipet e emergjencës mbërritën në vendngjarje për të ndihmuar të plagosurit dhe për të vënë nën kontroll zjarrin.

Autoritetet lokale kanë nisur hetimet për të përcaktuar rrethanat e sakta të shpërthimit dhe nëse janë respektuar masat e sigurisë për ruajtjen dhe përdorimin e materialeve piroteknike.

Bilanci i viktimave mund të ndryshojë, ndërsa disa prej të plagosurve ndodhen në gjendje të rëndë.