Qeveria po përgatit një Program Kombëtar për Inteligjencën Artificiale, ndërsa aftësimi në përdorimin e kësaj teknologjie do të bëhet i detyrueshëm për administratën publike. Kryeministri Edi Rama e bëri të ditur gjatë Forumit të Dytë të Inovacionit, ku në qendër të diskutimeve ishte zhvillimi teknologjik i Shqipërisë.

Rama tha se teknologjia i jep Shqipërisë mundësinë të bëjë kapërcime të mëdha, por paralajmëroi se vendi mund të mbetet shumë pas nëse nuk ecën me ritmin e zhvillimeve të reja.

Sipas shifrave të paraqitura prej tij, sektori i teknologjisë numëron rreth 28,500 profesionistë dhe 7 në 10 prej tyre janë nën 35 vjeç. Sektori përbën tashmë 2.2% të Prodhimit të Përgjithshëm Kombëtar.

Kryeministri vendosi si objektiv që eksportet e teknologjisë të arrijnë në 1 miliard euro deri në vitin 2030. Ai paralajmëroi gjithashtu rritjen e mbështetjes financiare për startup-et, pasi këtë vit fondi për to është dyfishuar.

Por Rama pranoi se përdorimi i teknologjive të reja nga bizneset mbetet në nivele të ulëta. Sipas tij, vetëm 24% e bizneseve tregtojnë online dhe vetëm 9% e sipërmarrjeve përdorin Inteligjencën Artificiale.

Një prej ndryshimeve më të rëndësishme të paralajmëruara prek administratën shtetërore. Programi kombëtar i aftësimit në Inteligjencën Artificiale do të jetë i hapur për individët, por i detyrueshëm për administratën publike. Integrimi i moduleve të AI ka nisur me drejtoritë juridike dhe parashikohet të shtrihet më tej në administratë.

Rama njoftoi gjithashtu se po punohet për një sistem 360 gradë të prokurimit publik me Inteligjencë Artificiale, si dhe për ridizajnimin e platformës shtetërore në versionin “e-Albania 2.0”.

Në fjalën e tij, kryeministri u ndal edhe te marrëdhënia mes shtetit dhe kompanive private të teknologjisë pas problematikave me AKSHI-n. Rama kritikoi kompanitë që, sipas tij, ishin mësuar të vareshin nga kontratat shtetërore dhe deklaroi se synimi është që gradualisht shërbimet publike të mbulohen nga kompania publike e ngritur nga qeveria.

Forumi mblodhi përfaqësues të qeverisë, biznesit, industrisë ICT dhe universiteteve, me fokus te përdorimi i AI-së në ekonomi dhe sektorin publik.