Në ambientet e Konsullatës së Përgjithshme të Republikës së Kosovës në Cyrih të Zvicrës, u mbajt promovimi i romanit më të ri “Zemrat pas Maleve”, me autor Blerim Ramadani.

Vepra letrare është e frymëzuar nga një ngjarje e vërtetë e periudhës së Luftës së Dytë Botërore dhe sjell në vëmendje një histori që ndërthur dimensionin njerëzor, historik dhe letrar.

Aktivitetin e hapi Shefi i Misionit, Vigan Berisha, i cili përshëndeti të pranishmit dhe theksoi rëndësinë e promovimit të krijimtarisë letrare që trajton ngjarje historike dhe kontribuon në ruajtjen e kujtesës kolektive.

Me një fjalë përshëndetëse iu drejtua të pranishmëve edhe Zëvendësambasadorja e Republikës së Kosovës në Bernë, Shukrije Ramadani.

Rreth përmbajtjes, dimensionit letrar dhe vlerave historike të romanit folën Bardhec Berisha nga Kosova, Tonin Nikolli nga Shqipëria dhe Bujar Salihu nga Shoqata e Krijuesve Shqiptarë në Zvicër.

Ndërkaq, vetë autori Blerim Ramadani foli për rrugëtimin e krijimit të librit, si dhe për sfondin e veçantë historik mbi të cilin është ndërtuar ky rrëfim.

Romani “Zemrat pas Maleve” sjell në vëmendje ngjarjen e vitit 1944, kur dy aviatorë amerikanë, pas rrëzimit të bombarduesit të tyre në malet shqiptare, u strehuan dhe u mbrojtën nga shqiptarët e zonës.

Në qendër të rrëfimit qëndrojnë njerëzit dhe zgjedhjet e tyre në kohë krize.

Përmes kësaj ngjarjeje, Besa e shqiptarit paraqitet si shprehje e humanizmit, besnikërisë dhe sakrificës në rrethana lufte.

Promovimi në Cyrih u përmbyll me një bashkëbisedim mes autorit Blerim Ramadani dhe artdashësve të pranishëm, të cilët patën mundësi të diskutojnë për veprën, ngjarjen historike që e ka frymëzuar dhe mesazhet që përcjell romani.