Të dhëna të reja po hedhin dritë mbi minutat kritike para vdekjes së këngëtarit të njohur grek Giorgos Mazonakis, i cili humbi jetën më 9 shtator në një klinikë në Kolonaki, ndërsa po i nënshtrohej një procedure plazmafereze.

Në qendër të hetimit tashmë janë të dhënat dixhitale të aparaturës së plazmaferezës, e cila ka regjistruar në mënyrë të detajuar momentet kur procedura u ndërpre, alarmet e përsëritura dhe një përpjekje për rinisjen e saj.

Sipas të dhënave të publikuara nga mediat greke, aparatura u aktivizua në orën 14:14, ndërsa shkëmbimi i gjakut me pacientin nisi rreth orës 14:37.

Recently Spotted Asteroid Set for Near Miss With EarthKeep Watching

Në orën 15:22 regjistrohet ndërprerja e parë e rëndësishme e procedurës. Nga ky moment, aparatura nisi të japë sinjale alarmi.

Një tjetër alarm u regjistrua në orën 15:23, ndërsa deri në orën 15:45 sistemi kishte regjistruar edhe sinjale të tjera. Sipas elementeve që po shqyrtohen nga hetuesit, këto sinjale lidhen me një përkeqësim të gjendjes së pacientit dhe mungesë të rrahjeve të zemrës.

Në orën 15:45 është regjistruar edhe një përpjekje për ta vënë sërish në punë aparaturën. Megjithatë, sipas të dhënave të hetimit, makina u ndal pothuajse menjëherë pas rinisjes.

Pikërisht ky moment është një nga pikat që po analizohet më me kujdes nga autoritetet, të cilat kërkojnë të përcaktojnë se çfarë po sinjalizonte aparatura dhe në çfarë gjendjeje ndodhej Mazonakis në atë moment.

Por ajo që e bën edhe më të rëndë kronologjinë është koha e thirrjes së urgjencës.

Telefonata drejt EKAB, shërbimit grek të urgjencës, është regjistruar në orën 16:11. Kjo do të thotë se nga ndërprerja e parë e procedurës në orën 15:22 deri në kërkimin e ndihmës urgjente kanë kaluar 49 minuta.

Ky interval është tashmë në qendër të hetimit, pasi autoritetet po përpiqen të rindërtojnë minutë pas minute se çfarë ndodhi brenda klinikës dhe cilat ishin veprimet e personave që ndodheshin aty.

Por hetimi ka nxjerrë në dritë edhe një tjetër element të pazakontë.

Nga telefoni i mjekes Ioanna Gaka janë rikuperuar dy fotografi të fshira dhe një video, të cilat janë krijuar pak minuta pasi kishte nisur procedura.

Sipas ekspertizës dixhitale, fotografia e parë është marrë në orën 14:43:36, ndërsa videoja është krijuar në 14:43:55. Fotografia e dytë është marrë në orën 14:45:22.

Të tre skedarët janë fshirë më vonë, pothuajse në të njëjtin moment. Fotografia e parë rezulton e fshirë në orën 19:09:09, ndërsa fotografia e dytë dhe videoja në orën 19:09:13.

Të dhënat e fotografive përmbanin gjithashtu koordinata gjeografike që përputhen me vendndodhjen e klinikës në rrugën Karneadou. Njëra prej fotografive rezulton se është dërguar edhe në një numër tjetër, ndërsa autoritetet ende po përpiqen të përcaktojnë se kujt i përkiste ai numër.

Sipas informacioneve të publikuara nga mediat greke, në njërën prej fotografive Mazonakis shfaqet i shtrirë në shtratin e klinikës, ndërsa aparatura e plazmaferezës është në funksion.

Në këtë pikë, kronologjia e hetimit paraqitet kështu:

14:14 – aktivizohet aparatura e plazmaferezës.

14:37 – nis procedura e shkëmbimit të gjakut.

14:43:36 – merret fotografia e parë nga telefoni i mjekes.

14:43:55 – krijohet videoja.

14:45:22 – merret fotografia e dytë.

15:22 – regjistrohet ndërprerja e parë e procedurës dhe alarmi i aparaturës.

15:23 – regjistrohet një tjetër alarm.

15:45 – regjistrohen sinjale të tjera dhe bëhet një përpjekje për rinisjen e aparaturës, e cila ndalet sërish.

16:11 – thirret urgjenca EKAB.

19:09 – fshihen dy fotografitë dhe videoja nga telefoni i mjekes.

Hetuesit po përpiqen tashmë të bashkojnë këto të dhëna dixhitale me dëshmitë e personave të pranishëm dhe materialet e tjera të sekuestruara për të rindërtuar me saktësi çfarë ndodhi gjatë atyre minutave.

Në të njëjtën kohë, dëshmia e taksistit që transportoi Mazonakis drejt klinikës ka marrë gjithashtu rëndësi në hetim. Ai ka deklaruar se këngëtari nuk i ishte dukur në gjendje të rënduar shëndetësore gjatë udhëtimit dhe se, sipas përshtypjes së tij, nuk kishte shfaqur ndonjë shqetësim të veçantë.

Tashmë, fokusi kryesor i hetimit është pikërisht intervali prej 49 minutash, nga alarmi i parë i aparaturës deri në momentin kur u kërkua ndihma emergjente.