Presley Gerber, djali i supermodeles së famshme Cindy Crawford dhe biznesmenit Rande Gerber, ka ndërruar jetë në moshën 27-vjeçare. Lajmi është konfirmuar nga një përfaqësuese e familjes, ndërsa vdekja është regjistruar edhe nga Zyra e Mjekësisë Ligjore të Los Angeles.

Sipas të dhënave të publikuara, Presley ndërroi jetë të dielën, më 20 shtator, në një qendër rehabilitimi në Kaliforni. Shkaku i vdekjes nuk është bërë ende publik, ndërsa autopsia nuk kishte përfunduar në momentin e raportimeve të para.

“Familja kërkon privatësi gjatë kësaj kohe shumë të vështirë dhe të dhimbshme”, deklaroi përfaqësuesja e familjes.

Presley ishte fëmija i madh i Cindy Crawford dhe Rande Gerber dhe vëllai i modeles dhe aktores Kaia Gerber. Ashtu si nëna dhe motra e tij, ai kishte ndjekur një karrierë në modeling, duke nënshkruar që në moshë të re me IMG Models dhe duke marrë pjesë më pas në fushata të markave të njohura.

Vitet e fundit, 27-vjeçari kishte folur publikisht për problemet e tij me shëndetin mendor dhe varësinë nga substancat. Në një prej postimeve të tij të fundit, Presley kishte treguar edhe për trajtimin që po ndiqte.

Për momentin, autoritetet nuk kanë bërë publik shkakun zyrtar të vdekjes dhe çdo pretendim për rrethanat në të cilat 27-vjeçari humbi jetën mbetet i pakonfirmuar.