Nga 12 tetori, sistemi “Qyteti i Sigurt” do të fillojë të zbatohet edhe në territorin e Kërçovës, me çka kontrollet dhe evidentimi i shkeljeve në komunikacion përmes këtij sistemi do të shtrihen edhe në këtë qytet.
Lajmin e ka bërë të ditur ministri i Punëve të Brendshme, Pançe Toshkovski, i cili njoftoi se përgatitjet për vendosjen e sistemit në territorin e SPB Ohër janë në fazën përfundimtare.
“Jemi në fazën përfundimtare dhe, në parim, jemi dakorduar që të jemi të gatshëm të fillojmë me zbatimin praktik të ‘Qytetit të Sigurt’ edhe në territorin e SPB Ohër, deri më 12 tetor. Dua t’i informoj qytetarët e Maqedonisë së Veriut, veçanërisht banorët e komunave Dibër, Kërçovë, Strugë dhe Ohër, se në territorin e SPB Ohër më 12 tetor do të fillojmë me zbatimin e ‘Qytetit të Sigurt’”, deklaroi Toshkovski.
Kjo do të thotë se nga 12 tetori edhe drejtuesit e automjeteve në Kërçovë dhe në zonat që mbulohen nga SPB Ohër do të jenë pjesë e sistemit të automatizuar të kontrollit të trafikut.
“Qyteti i Sigurt” në Maqedoninë e Veriut është në funksion që nga 1 shkurti i këtij viti. Pas fillimit të zbatimit, qytetarët kanë pasur një periudhë përshtatjeje prej rreth dy muajsh e gjysmë, gjatë së cilës janë informuar dhe janë kontrolluar për shkeljet në komunikacion, ndërsa sistemi është testuar dhe përmirësuar.
Pas Kërçovës, sistemi nga 12 tetori do të zbatohet edhe në Ohër, Strugë dhe Dibër, si pjesë e zgjerimit të “Qytetit të Sigurt” në territorin e SPB Ohër.