Reformat që po i zbatojmë duhet të jenë bazë për vlerësimin e përparimit tonë, ndërsa dialogu me Sofjen duhet të zhvillohet në prani të përfaqësuesve të Bashkimit Evropian ose NATO-s për të arritur efekt real, deklaroi sot kryeministri Hristijan Mickoski, duke iu përgjigjur pyetjeve të gazetarëve, transmeton Portalb.mk.

Duke komentuar informacionet e publikuara dje nga “Politico” se BE-ja planifikon përshpejtimin e integrimit për katër vende kandidate, ndërsa në mesin e tyre nuk janë Maqedonia e Veriut, Serbia dhe Bosnjë e Hercegovina, Mickoski tha se nuk ka informacione të tilla dhe se kjo do të ishte e palogjikshme, duke pasur parasysh reformat e zbatuara në kuadër të Agjendës së Reformave dhe Planit të Rritjes.

Në prag të takimit të paralajmëruar të premten me presidenten e Komisionit Evropian, Ursula fon der Leyen, dhe i pyetur se çfarë pret nga ky takim, kryeministri tha se do të diskutojnë për gjendjen aktuale në kuadër të procesit të zgjerimit, sfidat që kanë ndodhur ndërkohë dhe atë që pritet në periudhën e ardhshme.

“Kur hartoni një strategji dhe plan për politikën që do të ndiqni, duhet të keni parasysh zhvillimet në fqinjësi, por edhe në BE”, tha Mickoski, duke iu referuar rezultateve të zgjedhjeve në Gjermani dhe zgjedhjeve të ardhshme në Francë, si dhe zhvillimeve gjeopolitike dhe referendumit në Islandë.

Ai vlerëson se zhvillimet në BE janë një lloj treguesi mbi bazën e të cilit vendi duhet t’i ndërtojë politikat në periudhën që vijon.

I pyetur nëse në takimin me Von der Leyen do ta hapë çështjen e pjesëmarrjes së BE-së në negociatat me Bullgarinë, kryeministri theksoi se takimet dypalëshe të deritanishme pa palë të tretë nuk kanë pasur efekt thelbësor.

Ai tha se bisedimet duhet të zhvillohen në prani të përfaqësuesve të Komisionit Evropian ose NATO-s, në mënyrë që argumentet të përballen në mënyrë objektive, duke shtuar se aktualisht nuk ka komunikim personal me palën bullgare.

“Është logjike të ulemi dhe të bisedojmë në prani të përfaqësuesve të BE-së, sepse argumentet duhet të dëgjohen në mënyrë objektive. Kështu, kur ulemi dhe bisedojmë në baza dypalëshe, ajo që diskutohet nuk ka kurrfarë thelbi. As informimi i mëvonshëm nga këto takime nuk është ashtu siç është diskutuar. Vlerësoj se, për të pasur ndonjë efekt, për të pasur thelb në këto bisedime, është mirë të ketë përfaqësues nga Komisioni Evropian, në mënyrë që t’i dëgjojnë argumentet. Nëse argumentet tona nuk qëndrojnë, atëherë ne jemi të gatshëm t’i pranojmë argumentet e palës tjetër”, u përgjigj Mickoski.

Vizita e presidentes së Komisionit Evropian, sipas ekspertëve që kanë folur për Portalb.mk, shihet si një mundësi për të përcjellë mesazhe të reja për procesin e integrimit evropian të Maqedonisë së Veriut, por mbetet e paqartë nëse ajo mund të sjellë edhe një hap konkret drejt zhbllokimit të negociatave me Bashkimin Evropian.

Bashkimi Evropian po zhvillon plane veprimi, sipas të cilave katër vendet që janë më pranë anëtarësimit në bllok do të marrin një rrugë të qartë dhe të detajuar drejt anëtarësimit, ndërsa vendet e tjera do të lihen jashtë. Në grupin e dytë është edhe Maqedonia e Veriut.

Janë duke u shqyrtuar udhërrëfyes të posaçëm për Malin e Zi, Ukrainën, Moldavinë dhe Shqipërinë, deklaruan për “Politico” dy zyrtarë të lartë të Komisionit Evropian që po punojnë për draft-propozimet.