Rreth 400 shkolla në Francë pritet të qëndrojnë të mbyllura të premten, pasi protestat e nxënësve, të nisura për shkak të problemeve në sistemin arsimor, janë përshkallëzuar dhe në disa qytete kanë përfunduar në përleshje dhe dhunë.

Ministri francez i Arsimit, Edouard Geffray, tha të enjten në mbrëmje se pak më shumë se 400 shkolla dhe institucione të tjera arsimore do të jenë të mbyllura. Ai nuk dha një afat se kur pritet të rikthehet normaliteti.

Protestat nisën muajin e kaluar në zonën e Parisit. Nxënësit kanë kundërshtuar mungesën e mësuesve, kushtet e dobëta të godinave shkollore dhe problemet e tjera që, sipas tyre, po dëmtojnë arsimin. Me përhapjen e protestave në pjesë të ndryshme të Francës, situata është bërë më e tensionuar. Dhjetëra persona janë plagosur dhe policia ka kryer qindra arrestime.

Të enjten, protestuesit i vunë zjarrin të paktën dy shkollave të mesme. Në një shkollë tjetër në qytetin jugor të Marsejës, disa mësues u spërkatën pa dashje me benzinë gjatë incidenteve. Në Strasburg, në lindje të vendit, u dogj të paktën një makinë, ndërsa në Tuluzë, në jugperëndim, policia përdori forcat e ndërhyrjes për t’u përballur me të rinjtë që morën pjesë në protestë.

Ndërkohë, qeveria franceze ka ngritur pikëpyetje mbi organizimin dhe nxitjen e protestave. Sipas një zyrtari pranë kryeministrit Sebastien Lecornu, shërbimet e inteligjencës kanë informuar një takim të posaçëm të qeverisë se lëvizja e protestave është nxitur nga politikanë të së majtës radikale, përfshirë anëtarë të partisë La France Insoumise.

Deputeti i kësaj partie, Louis Boyard, i ka mohuar këto akuza në deklarata për mediat franceze. Autoritetet po përpiqen të kontrollojnë përhapjen e dhunës, ndërsa protestat vazhdojnë të ndikojnë drejtpërdrejt në funksionimin e shkollave. Mbyllja e rreth 400 institucioneve arsimore të premten pritet të prekë mijëra nxënës dhe familje në zona të ndryshme të Francës.