Një tjetër vjedhje e rëndë godet botën e artit në Francë. Persona ende të paidentifikuar kanë marrë nga një qendër arti në Auvergne veprën monumentale “L’Apocalypse”, të zbukuruar me ar e gurë të çmuar dhe të vlerësuar në disa milionë euro. Vetëm kopertina e realizuar nga Salvador Dalí peshon rreth 150 kilogramë.

Një prej veprave më të pazakonta të artit dhe botimeve të shekullit XX është zhdukur nga Qendra e Artit Bashkëkohor në Issoire, në rajonin francez të Auvergne. Hajdutët arritën të merrnin “L’Apocalypse”, një vepër monumentale me peshë rreth 210 kilogramë, e cila ndërthur artin, letërsinë dhe mjeshtërinë e librit.

Vjedhja ka tërhequr vëmendje jo vetëm për vlerën e veprës, që llogaritet në disa milionë euro, por edhe për përmasat e saj. Vetëm kopertina prej bronzi, e krijuar nga Salvador Dalí, peshon rreth 150 kilogramë. Vepra përmban gjithashtu ar dhe gurë të çmuar, duke e bërë transportimin e saj një operacion që vështirë se mund të kryhej pa përgatitje.

“L’Apocalypse” është përshkruar dikur si “libri më i çmuar në botë”. Historia e tij nisi në vitin 1959, kur botuesi francez i librave të artit Joseph Forêt ndërmori një projekt ambicioz të frymëzuar nga “Apokalipsi” i Shën Gjonit.

Forêt synonte të krijonte shumë më tepër se një libër. Ai mblodhi artistë, shkrimtarë dhe mendimtarë të njohur të kohës për të ndërtuar një vepër ku teksti, piktura, skulptura dhe materialet e çmuara të bashkoheshin në një objekt të vetëm.

Në realizimin e “L’Apocalypse” morën pjesë shtatë artistë, mes tyre Salvador Dalí, Georges Mathieu, Bernard Buffet dhe Leonor Fini. Krahas tyre, shtatë shkrimtarë dhe intelektualë kontribuuan me tekste, komente dhe reflektime. Mes emrave të përfshirë ishin Jean Cocteau, Emil Cioran dhe Ernst Jünger.

Dalí realizoi një prej elementeve më të dallueshme të veprës: kopertinën monumentale prej bronzi. Me peshën e saj prej rreth 150 kilogramësh, ajo e shndërroi librin në një objekt që qëndron në kufirin mes botimit dhe skulpturës.

Që prej vitit 1961, “L’Apocalypse” është prezantuar në ekspozita në vende të ndryshme të botës dhe gjatë dekadave ka kaluar në duart e disa pronarëve.

Në vitin 2002, vepra u ble nga koleksionisti Christian Karoutzos. Për të, blerja ishte një investim i jashtëzakonshëm personal. Karoutzos ka treguar se iu deshën rreth dhjetë vjet për ta shlyer plotësisht shumën e paguar, duke punuar shtatë ditë në javë.

Për më shumë se dy dekada ai e mbajti veprën në koleksionin e tij. Këtë verë, pas 24 vjetësh, vendosi ta ekspozonte në Qendrën e tij të Artit Bashkëkohor në Issoire, duke i dhënë publikut mundësinë ta shihte nga afër.

Ekspozimi zgjati vetëm disa muaj. Persona ende të paidentifikuar hynë në qendrën e artit dhe u larguan me veprën 210-kilogramëshe.

Autoritetet franceze kanë hapur një hetim për identifikimin e autorëve dhe gjetjen e “L’Apocalypse”. Për shkak të peshës, përmasave dhe karakteristikave të saj të dallueshme, vepra është praktikisht e pamundur të shitet hapur në tregun e ligjshëm të artit.

Për Karoutzos, humbja shkon përtej vlerës financiare prej disa milionë eurosh.

“Është një vepër unike në botë. Kanë vrarë trashëgiminë franceze, kanë vrarë Francën”, deklaroi koleksionisti pas vjedhjes.

Zhdukja e “L’Apocalypse” shton një tjetër rast në serinë e vjedhjeve që kanë goditur koleksionet dhe institucionet kulturore franceze, ndërsa hetuesit tani duhet të zbulojnë jo vetëm se kush arriti të merrte një objekt arti prej 210 kilogramësh, por edhe ku mund të ketë përfunduar një vepër kaq e njohur dhe e vështirë për t’u fshehur.

Shkruar nga Pamfleti