Microsoft prezantoi të hënën përshpejtuesin e saj të gjeneratës së tretë për inteligjencën artificiale, Maia, duke bërë të ditur planet për të zgjeruar përdorimin e çipave të saj duke filluar nga viti 2027 dhe për t’i bërë ata sistemin kryesor për nxjerrjen e rezultateve nga modelet e inteligjencës artificiale në produktet dhe shërbimet e saj.

Kompania planifikon ta zgjerojë familjen e saj Azure Maia në instalime me kapacitet shumëgigavatësh, tha Scott Guthrie, nënkryetar ekzekutiv për Cloud dhe Inteligjencën Artificiale, në një postim në blog.

Inferenca është procesi përmes të cilit modelet e trajnuara të inteligjencës artificiale gjenerojnë përgjigje ndaj kërkesave.

Microsoft pret që Maia 300 të ofrojë 40% më shumë tokenë për megavat sesa sistemet kryesore të bazuara në njësitë e përpunimit grafik (GPU). Sipas kompanisë, një konfigurim që përmban 96 përshpejtues mund të ofrojë deri në shtatë herë më shumë përpunim të tokenëve në nivel rafti sesa Maia 200.

Vendosja e Maia 300 në mjediset e prodhimit do të nisë në vitin 2027.

Paraardhësi i tij, Maia 200, tashmë mbështet ngarkesa pune në mjediset e prodhimit, përfshirë Microsoft Copilot, ndërsa GitHub Copilot dhe Microsoft Foundry pritet të pasojnë deri në fund të vitit.

Sistemi i ri është projektuar për ngarkesa pune që përfshijnë arsyetimin me kontekst të gjatë, bisedat që kërkojnë reagim të shpejtë dhe detyrat me shumë hapa të agjentëve të inteligjencës artificiale, tha Microsoft./AA