Të paktën 600 mijë persona në të gjithë Ukrainën kanë mbetur pa energji elektrike pas sulmeve me raketa dhe dronë të kryera nga Rusia gjatë natës. Lajmi është bërë i ditur nga Presidenti ukrainas, Volodymyr Zelensky, i cili raportoi gjithashtu për viktima dhe dëme të konsiderueshme në infrastrukturën energjetike të vendit. Sipas Zelenskyt, objektet kritike të energjisë janë goditur në Kiev dhe në rajonin përreth kryeqytetit, si dhe në qytetin verilindor të Kharkivit.

Në kryeqytetin ukrainas, të paktën tre persona kanë humbur jetën dhe 21 të tjerë janë plagosur, sipas Shërbimit Shtetëror të Emergjencave të Ukrainës (DSNS). Sulmet vijnë pavarësisht deklaratës së Presidentit amerikan, Donald Trump, i cili të dielën (11 tetor) njoftoi se Rusia dhe Ukraina kishin rënë dakord për një “armëpushim energjetik”, duke u bërë thirrje të dyja palëve të mos e shkelin marrëveshjen. Forcat Ajrore të Ukrainës bëjnë me dije se Rusia ka lëshuar gjatë natës 39 raketa balistike dhe kruz, si dhe 128 dronë. Sipas tyre, sistemet ukrainase të mbrojtjes ajrore kanë rrëzuar katër raketa dhe 115 dronë.

Nga ana tjetër, Ministria ruse e Mbrojtjes deklaroi se sulmet e saj masive kishin në shënjestër objektet e komunikimit dhe energjisë në rajonet e Kievit dhe Kharkivit, të cilat, sipas Moskës, përdoren nga ushtria ukrainase. Moska pretendoi gjithashtu se gjatë natës kishte rrëzuar 902 dronë ukrainas mbi disa rajone ruse, përfshirë Moskën dhe Krimenë, gadishullin ukrainas të aneksuar nga Rusia në vitin 2014. Presidenti ukrainas, Volodymyr Zelensky, ka deklaruar vazhdimisht se Kievi është i gatshëm të ndalë sulmet ndaj rafinerive ruse të naftës dhe objekteve të tjera energjetike, nëse Moska ndërmerr të njëjtin hap. Megjithatë, goditjet e fundit ndaj infrastrukturës energjetike ukrainase ngrenë pikëpyetje mbi zbatimin e armëpushimit të njoftuar nga Trump.

/rtsh.al/