Një shtetas 34-vjeçar i Malit të Zi është arrestuar në pikën kufitare të Tabanocit, pasi kamerat e sistemit “Qyteti i Sigurt” e kishin regjistruar duke drejtuar automjetin me shpejtësi 185 kilometra në orë, në një segment rrugor ku kufizimi është 100 km/h.

Sipas policisë, M.N. u ndalua më 14 tetor, rreth orës 14:25, gjatë përpjekjes për t’u larguar nga Maqedonia e Veriut me automjetin e tij BMW, me targa malazeze.

Shkelja ishte regjistruar në autostradën Shkup–Tabanoc, pranë nyjës rrugore të Delladrocit, ku shoferi kishte tejkaluar shpejtësinë e lejuar për 85 kilometra në orë.

Pas verifikimeve, policia konstatoi se ndaj tij ekzistonte dyshimi për veprën penale “drejtim i pakujdesshëm dhe i rrezikshëm i automjetit”, sipas nenit 297-a të Kodit Penal.

34-vjeçari është shoqëruar në stacionin policor, ndërsa pas dokumentimit të rastit ndaj tij do të parashtrohet kallëzim penal.