Në qytetin e Durrësit po zhvillohet Kampionati Europian i peshëngritjes për kategorinë Junior dhe U-23, një event që ka qenë pozitiv për Shqipërinë, që ka siguruar dcisa medalje me shtangistët e saj.

Kështu, në kategorinë Junior për djem, pesha 65kg, shtangisti Samoel Rrasa mori medaljen e bronztë në stilin e shtytjes, me 153kg. Më herët, në shkëputje, ai u klasifikua në vendin e katërt me 125kg. Në dygarësh, me 278kg, Rrasa u rendit në vendin e katërt.

Në peshën 61kg të kategorisë U-23 për vajza, peshëngritësja Gea Dokollari u rendit në vendin e 12-të pë stilin e shkëputjes, me 75kg. Në stilin e shtytjes, ajo u klasifikua në vendin e 16-të me 85kg, ndërsa në dygarësh u rendit e 15-ta, me 160kg në total.

Peshëngritësi Flavjo Alliaj garoi në peshën 70kg të kategorisë Junior. Në stilin e shkëputjes, ai realizoi 125kg, duke u renditur në vendin e 7-të, ndërsa në shtytje ai realizoi 150kg, duke u renditur i 9-ti. Me 275kg në total, Alliaj u klasifikua në vendin e 7-të.

Po në kategorinë Junior, pesha 75kg, shtangisti Antonino Mullisi realizoi 130kg në stilin e shkëputjes, ku u klasifikua i teti. Në shtytje ai nuk realizoi asnjë provë, duke mos u klasifikuar as në dygarësh.

Shtangistja Enkileda Carja vijon me medalje. Në peshën 69kg të kategorisë Junior, ajo u rendit e dyta me 101kg në shkëputje, duke marrë medalje argjendi. Medalje e dytë e argjendit erdhi në shtytje, me 123kg, ndërkohë që në dygarësh mori medaljen e tretë të argjendtë me 224kg.