Franca përgatitet për protesta masive kundër shtrenjtimit të jetesës dhe pabarazisë sociale, ndërsa

studentëve dhe sindikatave pritet t'u bashkohen edhe “Jelekët e Verdhë”. Qeveria paralajmëron rrezikun e dhunës, pas përplasjeve të javëve të fundit që kanë lënë mbi 900 policë të plagosur.

Protestat masive në Francë kundër rritjes së çmimeve, pabarazisë ekonomike dhe përkeqësimit të shërbimeve publike, nuk po ndalen.

Studentëve dhe sindikatave u janë bashkuar edhe përfaqësues të lëvizjes së njohur si “Jelekët e Verdhë”, duke rritur ndjeshëm pjesëmarrjen, por edhe dhunën në rrugët e disa qyteteve

Protestat nisën muajin e kaluar në shkollat e periferive të varfra veriore të Parisit, ku nxënësit kundërshtuan mungesën e mësuesve dhe kushtet e dobëta të ambienteve arsimore. Pakënaqësitë u përhapën më pas në të gjithë vendin, duke u shndërruar në një lëvizje kundër pabarazisë dhe financimit të pamjaftueshëm të shërbimeve publike.

Tensionet vijnë në një periudhë të vështirë për presidentin Emmanuel Macron, i cili po i afrohet fundit të mandatit, ndërsa Franca përballet me polarizim politik, probleme buxhetore dhe rritje të kostove të huamarrjes në nivelet më të larta prej më shumë se dy dekadash.

Kryeministri Sébastien Lecornu paralajmëroi rrezikun e trazirave, duke e përshkruar situatën si një periudhë lodhjeje të përgjithshme shoqërore, të shkaktuar nga luftërat, inflacioni dhe rënia e fuqisë blerëse.

Sipas tij, protestat e fundit kanë qenë ndër më të dhunshmet në dekada, me mbi 900 efektivë policie të plagosur që nga nisja e tyre.

Ndërkohë, policia është përballur me kritika për përdorimin e forcës ndaj demonstruesve. Të paktën 24 raste të dyshuara të dhunës policore po hetohen nga organi i kontrollit të brendshëm.

Mes incidenteve më të rënda është plagosja e një adoleshenti, i cili humbi dorën pas shpërthimit të një granate policore trullosëse.