Aktori i njohur indian Tiger Shroff, 36 vjeç, ka shpëtuar pa lëndime nga një sulm me armë zjarri ndaj automjetit me të cilin po udhëtonte në Mumbai. Ngjarja ndodhi mbrëmjen e së dielës, më 18 tetor, në zonën Juhu, ndërsa nga të shtënat mbetën të plagosur dy persona, mes tyre edhe shoferi i aktorit.

Sipas informacioneve të raportuara nga mediat indiane, Shroff sapo ishte larguar nga një klub futbolli, ku kishte kaluar kohën duke luajtur, kur disa persona të armatosur iu afruan makinës së tij dhe qëlluan disa herë nga një distancë e afërt.

Në pamjet që kanë qarkulluar pas ngjarjes shihen të paktën dy persona duke hapur zjarr drejt automjetit, në një zonë ku në ato momente ndodheshin edhe kalimtarë të tjerë.

Recently Spotted Asteroid Set for Near Miss With EarthKeep Watching

Përveç shoferit të aktorit, i cili u transportua për të marrë ndihmë mjekësore, nga plumbat mbeti i plagosur edhe drejtuesi i një taksie me tri rrota, që ndodhej pranë vendit ku ndodhi sulmi.

Policia e Mumbait ka nisur hetimet për zbardhjen e rrethanave dhe identifikimin e autorëve. Hetuesit po shqyrtojnë regjistrimet e kamerave të sigurisë dhe po marrin në pyetje dëshmitarët për të përcaktuar mënyrën se si u organizua dhe u krye sulmi.

Ndërkohë, autoritetet po verifikojnë edhe dyshimet për përfshirjen e një grupi kriminal të lidhur me Lawrence Bishnoi. Mediat indiane kanë raportuar se kjo organizatë mund të ketë marrë përgjegjësinë për ngjarjen, por një pretendim i tillë ende nuk është konfirmuar zyrtarisht.

Pas incidentit, aktori u vizitua nga zëvendëskryeministri i shtetit të Maharashtras, Eknath Shinde, i cili dënoi sulmin dhe paralajmëroi masa ndaj personave përgjegjës.

“Këto përpjekje për frikësim nuk do të tolerohen dhe ne do t’i japim fund këtij lloj huliganizmi”, deklaroi ai.

Ngjarja ka rikthyer shqetësimet për sigurinë e personazheve të njohur të industrisë së filmit në Indi, të cilët edhe më parë kanë qenë objekt i sulmeve dhe kërcënimeve.

Në vitin 2024, dy persona u arrestuan si të dyshuar për të shtënat me armë ndaj banesës së aktorit të famshëm Salman Khan. Po gjatë atij viti, politikani Baba Siddique u vra në Mumbai nga persona të armatosur, një ngjarje që nxori sërish në vëmendje aktivitetin e grupeve kriminale.

Tiger Shroff është një nga aktorët e njohur të Bollywood-it, veçanërisht për interpretimet e tij në filmat aksion. Karrierën kinematografike e nisi në vitin 2014 me filmin romantik Heropanti, ndërsa krahas aktrimit njihet edhe për pasionin ndaj sportit, veçanërisht futbollit.