Më 13 tetor 2026, Besarta Çeliku Ramadani mbrojti me sukses disertacionin e doktoratës pranë Fakultetit të Shkencave Matematiko-Natyrore të Universitetit “Shën Kirili dhe Metodi” në Shkup, duke fituar titullin "Doktor i Shkencave të Kimisë".
Disertacioni i saj, me titull “Synthesis, Characterization, and Electrocatalytic Properties of Perovskites with the General Formula LnMn₀.₅M₀.₅O₃ (Ln = Pr, Gd, Sm, Nd; M = Cr, Fe, Co, Ni, Cu)”, trajton sintezën, karakterizimin dhe studimin e vetive elektrokatalitike të materialeve me strukturë perovskite, me rëndësi për zhvillimin e materialeve funksionale dhe aplikimet elektrokimike.
Disertacioni u mbrojt para komisionit të përbërë nga Prof. Dr. Slobotka Aleksovska, Prof. Dr. Valentin Mirceski, Prof. Dr. Miha Bukleski, Prof. Dr. Sani Demiri dhe Prof. Dr. Arianit Reka.
Besarta Çeliku Ramadani i përfundoi studimet universitare në vitin 2015 në Fakultetin e Shkencave të Natyrës dhe Matematikës pranë Universitetit të Tetovës, në drejtimin Biokimi Analitike, me notën mesatare 9.15. Në vitin 2018, në të njëjtin universitet, përfundoi studimet pasuniversitare në fushën e kimisë, me notën mesatare 9.64, duke fituar titullin Magjistër i Kimisë.
Nga viti 2016 deri në vitin 2025, ajo ishte e angazhuar si asistente me honorar në fushën e kimisë pranë Fakultetit të Shkencave të Natyrës dhe Matematikës të Universitetit të Tetovës. Që nga viti 2025, punon si asistente në Universitetin “Nënë Tereza” në Shkup, ku vazhdon veprimtarinë e saj akademike dhe shkencore.
Në kuadër të veprimtarisë së saj kërkimore, ajo ka publikuar pesë punime shkencore në revista ndërkombëtare. Ndër revistat ku janë publikuar punimet e saj përfshihen Materials (Impact Factor 3.1), Electrocatalysis dhe Journal of the American Ceramic Society (Impact Factor 4.2). Kërkimet e saj përqendrohen në sintezën dhe karakterizimin e materialeve me strukturë perovskite dhe studimin e vetive të tyre elektrokatalitike.
Në vitin 2025, ajo mori pjesë në "European Crystallography School 2025", duke zgjeruar njohuritë dhe përvojën e saj në fushën e kristalografisë. Gjithashtu, gjatë karrierës së saj akademike, ka marrë pjesë në konferenca dhe punëtori të ndryshme shkencore ndërkombëtare.
Mbrojtja e suksesshme e doktoratës përbën një arritje të rëndësishme në karrierën e saj akademike dhe shënon një etapë të re në zhvillimin e mëtejshëm të veprimtarisë së saj në mësimdhënie dhe kërkim shkencor.