Elbasani ka gjetur trajnerin e ri. Glen Daja pritet të marrë drejtimin e skuadrës verdheblu, duke nisur një aventurë të re në karrierën e tij si trajner dhe duke krijuar një situatë të veçantë në futbollin shqiptar.

Glen Daja mësohet ka arritur marrëveshjen me drejtuesit e Elbasanit dhe pritet të prezantohet zyrtarisht në këtë detyrë gjatë ditës së nesërme.

Deri më tani, ai ka qenë pjesë e stafit teknik të Dinamos, ku ka punuar si ndihmës i babait të tij, Ilir Daja. Tashmë, rrugët e tyre profesionale do të ndahen, të paktën për sa i përket roleve në stol, pasi Gleni do të drejtojë Elbasanin, ndërsa Ilir Daja do të vijojë punën në krye të Dinamos.

Kjo situatë pritet të sjellë një përballje të veçantë mes babait dhe djalit, një rast i rrallë dhe unik në historinë e futbollit shqiptar. Përballja mes tyre do të jetë një nga episodet më interesante të kampionatit, duke i dhënë një tjetër dimension rivalitetit mes dy skuadrave.

Glen Daja do të pasojë në pankinën e Elbasanit serbin Ivan Gvozdenoviç, i cili dha dorëheqjen pas rezultateve jo të mira në javët e para të Kategorisë Superiore.

Elbasani, që synon të jetë protagonist në kampionat, shpreson që ndryshimi në stol të sjellë një kthesë në rezultate dhe ta ndihmojë skuadrën të përmbushë objektivat e sezonit.

Për Glen Dajën, kjo do të jetë një sfidë e rëndësishme, pasi do të ketë mundësinë të dëshmojë aftësitë e tij si trajner në një ekip me ambicie, ndërsa në anën tjetër do të ketë edhe emocionin e veçantë të përballjes me babain e tij, Ilir Dajën.