Për mungesën e sinjalizimit vertikal dhe horizontal rrugor në segmentin Osllomej–Tuhin, Televizioni Uskana iu drejtua Ndërmarrjes Publike „Rrugët Shtetërore” dhe NP „Rrugët e Maqedonisë”, për të marrë përgjigje lidhur me gjendjen e sinjalizimit në rrugën rajonale Kërçovë–Tuhin.

Nga përgjigjet zyrtare të dy ndërmarrjeve publike rezulton se për këtë aks rrugor ende nuk është siguruar dokumentacioni projektues për vendosjen e sinjalizimit, ndërsa për këtë qëllim nuk janë paraparë as mjete financiare në programin vjetor dhe planin e prokurimeve publike të NP „Rrugët Shtetërore” për vitin 2026.

Nga NP „Rrugët Shtetërore” bëjnë të ditur se disponojnë me projekt për sinjalizimin rrugor në rrugën rajonale P2331, në segmentin Osllomej–Tuin. Megjithatë, për segmentin Kërçovë–Tuhin, sipas përgjigjes zyrtare, nuk ekziston dokumentacion projektues.

Nga kjo ndërmarrje sqarojnë se janë përgjegjëse për përzgjedhjen e projektuesve dhe hartimin e dokumentacionit teknik, ndërsa për mirëmbajtjen e sinjalizimit ekzistues rrugor është përgjegjëse NP „Rrugët e Maqedonisë”.

Nga ana tjetër, NP „Rrugët e Maqedonisë” konfirmon se në segmentin përkatës aktualisht nuk është vendosur sinjalizimi i nevojshëm rrugor. Sipas kësaj ndërmarrjeje, pa dokumentacionin përkatës projektues nuk mund të fillojë në mënyrë të pavarur hartimi i projektit dhe vendosja e sinjalizimit.

Gjithashtu, nga kjo ndërmarrje theksojnë se për hartimin dhe realizimin e projektit nevojitet paraprakisht pëlqimi i NP „Rrugët Shtetërore”, në përputhje me kompetencat ligjore.

Ndërkohë, lidhur me pretendimet për dëmtimin e shtresës së asfaltit nga qarkullimi i mekanizimit të rëndë të Tec Osllomej, NP „Rrugët e Maqedonisë” njofton se do të kryejë inspektim në terren, pas të cilit do të ndërmerren masa përkatëse, në varësi të gjendjes së konstatuar.

Përgjigjet e dy ndërmarrjeve publike ngrenë pikëpyetje për hapat e mëtejshëm drejt zgjidhjes së problemit. Nëse ekziston projekt për sinjalizimin e rrugës rajonale P2331, në segmentin Osllomej–Tuhin, siç konfirmon NP „Rrugët Shtetërore”, shtrohet pyetja pse ky projekt nuk është realizuar deri më tani dhe nëse dokumentacioni ekzistues mund të shfrytëzohet edhe për pjesën problematike të aksit Kërçovë–Tuhin.

Deri në sqarimin e përgjegjësive ndërmjet dy ndërmarrjeve, mbetet e paqartë se kur do të fillojë vendosja e sinjalizimit rrugor dhe nëse për këtë do të nevojitet hartimi i një projekti të ri.

TV Uskana do të vazhdojë ta ndjekë këtë çështje, me interes për sigurinë e të gjithë pjesëmarrësve në komunikacion.