Shkolla e mesme komunale “Drita” në Kërçovë, e cila për një periudhë të gjatë është udhëhequr nga ushtrues detyre, vazhdon të mbetet pa drejtor të zgjedhur. Në këtë pozitë, më 7 maj të këtij viti u emërua Syarta Spahiu.

Këshilli i shkollës , para një kohe,  në përputhje me Ligjin për Arsimin e Mesëm dhe statutit të shkolls,shpalli konkurs publik për zgjedhjen e drejtorit të ri. Mirëpo, procedura nuk ka përfunduar me sukses.

Siç bëjnë të ditur nga Këshilli i shkollës së mesme “Drita” për TV USKANA, të enjten është mbajtur mbledhja për shqyrtimin e aplikimeve dhe dokumentacionit të kandidatëve.

Fillimisht, ishte formuar një komision prej tre anëtarësh, i cili kishte për detyrë të verifikonte dokumentacionin e aplikantëve. Për këtë pozitë kishte aplikuar vetëm një kandidat.

Pas shqyrtimit të dokumentacionit, njëri nga anëtarët e komisionit kishte paraqitur vërejtjet e tij.

Pas shqyrtimit të raportit dhe dokumentacionit, Këshilli shkollës ka konstatuar se kandidatja nuk i përmbush kushtet e kërkuara për këtë pozitë. Raporti ishte hedhur në votim, ku nga gjithsej tetë anëtarët e pranishëm, tre votuan në favor të raportit ndërsa pesë votuan kundër tij.

Meqenëse raporti nuk mori shumicën e nevojshme të votave, procedura për zgjedhjen e drejtorit është ndërprerë.

Për dështimin e konkursit, Këshilli I shkollës do ta njoftojë Komunën e Kërçovës, e cila pritet të vendosë për hapat e mëtejshëm, përfshirë emërimin e një ushtruesi të ri të detyrës apo gjetjen e një zgjidhjeje të përkohshme, deri në shpalljen e konkursit të radhës për zgjedhjen e drejtorit të shkollës.