Një aksident i rëndë ajror ka tronditur shtetin amerikan të Floridës, ku një avion privat është rrëzuar të dielën, duke u marrë jetën të nëntë personave që ndodheshin në bord.
Lajmi është konfirmuar nga sekretari amerikan i Transportit, Sean Duffy, i cili e cilësoi ngjarjen si një “tragjedi të tmerrshme”.
Sipas Administratës Federale të Aviacionit, avioni i tipit Learjet 60 ishte nisur nga aeroporti ndërkombëtar Austin-Bergstrom në Teksas dhe kishte si destinacion Bahamasin.
Avioni u rrëzua rreth orës 12:50, sipas kohës lokale, pranë zonës Cresthaven, në qarkun Palm Beach të Floridës.
Për shkak të përhapjes së pjesëve të nxehta metalike dhe zjarrit të shkaktuara nga përplasja, autoritetet urdhëruan evakuimin e rreth 600 banorëve të një komuniteti pranë vendit të aksidentit.
Fatmirësisht, asnjë person në tokë nuk mbeti i lënduar.
Guvernatori i Floridës, Ron DeSantis, e përshkroi përplasjen si katastrofike.
“Dukej sikur një raketë po binte drejt tokës”, deklaroi ai.
Sipas komunikimeve me kontrollin ajror në Miami, pilotja kishte raportuar praninë e akullit dhe turbulenca mesatare gjatë fluturimit.
Ajo kishte planifikuar të ngjitej mbi zonën me turbulenca, por pak çaste më vonë shpalli gjendjen e emergjencës.
“Do të rrëzohemi”, dëgjohet të ketë thënë pilotja, duke raportuar se kishte humbur kontrollin e avionit dhe se po humbiste me shpejtësi lartësinë.
Autoritetet nuk kanë publikuar ende identitetin e viktimave. Shkaqet e aksidentit po hetohen nga FAA dhe Bordi Kombëtar i Sigurisë së Transportit.
