Lidhja Shqiptare ka reaguar ndaj shkrimit të kryetarit të Komunës së Butelit, Darko Kostovski, duke e cilësuar atë si kërcënim ndaj kryetarit të kësaj partie, Ziadin Sela. Nga kjo parti kërkojnë reagim urgjent të Prokurorisë, MPB-së dhe përfaqësive diplomatike në vend.

Në reagimin e plotë thuhet:

“Shkrimi i mbrëmshëm i Kryetarit të Komunës së Butelit, Darko Kostovski ishte një kërcënim skandaloz drejtuar Kryetarit të Lidhjes Shqiptare, Ziadin Sela. Tërthorazi Kostovski tenton të përcjellë mesazhe kërcënuese dhe retorikë të dhunshme, një gjuhë e papranueshme dhe e patolerueshme për diskursin politik në një vend që pretendon të quhet demokratik.

Duam t’i bëjmë me dije se deklaratat e tilla asnjëherë nuk do të na lëkundin nga qëndrimet tona në mbrojtje të Kauzës Kombëtare dhe avancimin e pozitës së shqiptarëve në Maqedoninë e Veriut. Ta themi shkurt e Shqip: Nuk të trembet kush ty o…

Por, institucionet kompetente, Prokuroria, MPB dhe organet e tjera të rendit duhet që urgjentisht, me detyrë zyrtare të reagojnë dhe sanksionojnë gjuhën e përdorur nga Kostovski. Nëse një kryetar komune guxon të kërcënojë një deputet dhe një kryetar partie, paramendoni çfarë janë në gjendje të bëjnë me qytetarët e rëndomtë. Kjo flet më së miri për mendësinë e kësaj garniture qeverisëse e cila duhet të çrrënjoset urgjentisht.

Lidhja Shqiptare kërkon edhe nga përfaqësitë diplomatike në vend që të evidentojnë dhe dënojnë këtë veprim skandaloz të Kostovskit dhe të tjerëve si ai.

Për fund duam t’i kujtojmë Kostovskit se fitorja e një kandidati shqiptar në Butel nuk është vetëm dëshirë, por ne do të punojmë dhe shumë shpejtë do të bëhet realitet. E atëherë do tu tregojmë se si qeveriset drejtë, në bashkëjetesë dhe pa diskriminim.”