KF Vëllazërimi nga Kërçova ka bërë të ditur se ka lindur një iniciativë qytetare për ndërtimin e tribunës së stadiumit të klubit, një projekt që synon përmirësimin e infrastrukturës sportive dhe ruajtjen e traditës së tij.
Sipas njoftimit zyrtar të klubit, kjo nismë ka lindur pas aktivitetit përkujtimor në nder të Qamil Likës, ish-themeluesit dhe futbollistit të gjeneratës së parë të KF Vëllazërimit.
Kryesia e klubit e ka mirëpritur dhe mbështetur iniciativën, duke e cilësuar atë si një projekt me rëndësi të veçantë, sidomos në prag të 50-vjetorit të themelimit të klubit, i cili do të shënohet në vitin 2027.
Nga KF Vëllazërimi bëjnë thirrje që kësaj nisme t’i bashkohen qytetarët, sportdashësit dhe mërgimtarët, të cilët dëshirojnë të kontribuojnë në realizimin e këtij projekti.
Ndërkohë, në anën tjetër të stadiumit, një kohë më parë, Federata e Futbollit të Maqedonisë së Veriut (FFM), në bashkëpunim me Komunën e Kërçovës, kishte rrënuar tribunën ekzistuese me qëllim të ndërtimit të një tribune të re, në kuadër të projektit “Hat-trick”. Megjithatë, në atë hapësirë deri më tani ka mbetur vetëm një gropë, pa nisur realizimi i projektit të paralajmëruar. Për këtë gjendje, disa herë janë ankuar edhe banorët që jetojnë në afërsi të stadiumit, të cilët kanë ngritur shqetësime për erën e pakëndshme që përhapet nga kjo hapësirë, si dhe për shfaqjen e shpeshtë të gjarpërinjve.