Dega e Bashkimit Demokratik për Integrim në Kërçovë ka reaguar me rastin e njëvjetorit të dorëzim-pranimit të detyrës së kryetarit të Komunës së Kërçovës, nga Fatmir Dehari te Aleksandar Jovanovski.

Në reagimin e saj, BDI Kërçovë kritikon qeverisjen njëvjeçare të kryetarit aktual, duke pretenduar se gjatë kësaj periudhe nuk është realizuar asnjë projekt kapital dhe nuk është përmbushur asnjë nga premtimet kryesore të dhëna gjatë fushatës elektorale.

Sipas BDI-së, një vit më parë, Fatmir Dehari e dorëzoi detyrën publikisht, së bashku me procesverbalin e dorëzim-pranimit, i cili, sipas tyre, dëshmonte se komuna po kalonte në udhëheqjen e re pa borxhe, me projekte të realizuara dhe të tjera në proces realizimi.

Në reagim ngrihen edhe çështje të transparencës në shpenzimin e mjeteve publike, trajtimit të barabartë të qytetarëve, punësimeve dhe largimeve nga puna, si dhe respektimit të të drejtave gjuhësore dhe kombëtare të shqiptarëve në Komunën e Kërçovës.

BDI Kërçovë kërkon nga kryetari Jovanovski të japë llogari para qytetarëve për premtimet e realizuara, projektet e ndërmarra dhe mënyrën e menaxhimit të buxhetit komunal.

„Kërçovarëve nuk u duhen njerëz që rrinë duarkryq dhe përvetësojnë meritat e punës së të tjerëve, por njerëz që punojnë dhe u shërbejnë qytetarëve“, thuhet në reagimin e Degës së BDI-së në Kërçovë.