Një grup të rinjsh shqiptarë nga diaspora, pjesëmarrës në programin OriginAL, sot vizituan kompleksin memorial „Nëna Shqiptare” në Zajaz.
OriginAL është një iniciativë e pavarur, e themeluar nga GERMIN dhe Global Albanians Foundation, e cila synon forcimin e lidhjeve të brezave të rinj me vendet e origjinës përmes përvojave edukative, kulturore dhe vullnetare.
Gjatë vizitës, të rinjtë u pritën nga gazetari Bekim Adili, i cili i njoftoi për historikun, simbolikën dhe përmbajtjen e kompleksit memorial, duke përgëzuar njëkohësisht organizatorët për realizimin e kësaj nisme.

Koordinatori i programit, Egzon Sadiku, tha se përmes OriginAL synohet krijimi dhe forcimi i lidhjeve ndërmjet të rinjve të diasporës dhe vendeve të origjinës, duke nxitur njohjen e trashëgimisë kulturore dhe forcimin e identitetit kombëtar.

Në realizimin e kësaj vizite kontribuoi edhe organizata „Loja”, si partnere e programit. Përfaqësuesi i saj, Bujar Luma, foli për rëndësinë e kësaj nisme në afrimin e të rinjve të diasporës me vendet e tyre të origjinës, kulturën dhe trashëgiminë kombëtare.

Programi OriginAL synon që përmes aktiviteteve të këtilla të krijojë ura lidhëse ndërmjet brezave të rinj të diasporës dhe vendlindjes së të parëve të tyre.
Kjo vizitë mund të shërbejë edhe si një nxitje për inicimin e një programi të ngjashëm për të rinjtë e diasporës kërçovare, duke u krijuar mundësi që të njihen më nga afër me historinë, kulturën, trashëgiminë dhe vendet me rëndësi historike të trevës së Kërçovës.