Shkodra, me arkitekturën e saj ka tërhequr vëmendjen e profesorit italian të historisë së artit, Francesco Poli. Gjatë vizitës në qytet, ai vlerëson bashkëjetesën mes stileve të ndryshme, nga trashëgimia e hershme, ndikimet italiane, deri te arkitektura religjoze dhe ajo moderne.

“Ajo që më ka bërë më shumë përshtypje është dialogu mes llojeve të ndryshme të arkitekturës, brenda një strukture urbanistike shumë të ekuilibruar. Edhe ndërhyrjet e arkitekturës bashkëkohore më duken interesante. Shoh se edhe tani ka projekte të reja dhe mendoj se kjo mund të funksionojë mirë. Një qytet, nga njëra anë, duhet të ruajë identitetin e vet përmes arkitekturës që e karakterizon, por nga ana tjetër duhet të vazhdojë të jetë i gjallë“, u shpreh Profesor i Historisë së Artit.

Një tjetër objekt që tërheq vëmendjen është ndërtesa e Radio Shkodrës. u shpreh Profesor i Historisë së Artit.

“Më ka lënë vërtet shumë mbresa. stili i ndërtesës më kujton arkitekturën e racionalizmit francez, deri diku edhe ndërtesat e radiotelevizionit publik francez, si dhe veprat e arkitektëve të mëdhenj racionalistë”, tha ai.

Vlerat e kësaj godine i evidenton edhe skulptori Vladimir Llakaj.

“Kur hymë të dy, u habitëm, por ai e shprehu më shumë habinë, sepse nuk e priste që në një vend me arkitekturë tradicionale, siç kemi pasur ne, të gjente diçka kaq artistike”, tha skulptori, Vladimit Llakaj.

Sipas Polit, ruajtja e trashëgimisë nuk duhet ta pengojë zhvillimin e qytetit, por ndërhyrjet e reja duhet të jenë të kontrolluara, cilësore dhe në harmoni me identitetin ekzistues. Për të, Shkodra është një qytet që ka ditur të ruajë këtë dialog mes së shkuarës dhe së tashmes.

Gazetar: Marjo Gjini

/rtsh.al/