Në Kërçovë, sot u mbajt seminar me temë „Akideja e Tahaviut”, në kuadër të bashkëpunimit ndërmjet Bashkësisë Fetare Islame të Republikës së Maqedonisë së Veriut dhe Ministrisë së Çështjeve Islame, Thirrjes dhe Udhëzimit të Mbretërisë së Arabisë Saudite.

Myftiu i Kërçovës, Qamil Rushiti, për Televizionin Uskana tha se seminari iu kushtua trajtimit të çështjeve të akides islame, bazuar në veprën e autorit Ebu Xhafer Et-Tahaviu El-Hanefiu. Ligjërues i seminarit ishte Hassan Muhammed Al-Shehri, ndërsa në të morën pjesë imamë nga Myftinia e Kërçovës, si dhe përfaqësues nga myftinitë e Dibrës dhe Prilepit…..

Ndërkaq, Fejzulla Sadiki, drejtor i Sektorit Fetaro-Arsimor pranë Bashkësisë Fetare Islame, vlerësoi rëndësinë e këtij seminari për imamët dhe ligjëruesit fetarë, duke theksuar se përmes aktiviteteve të tilla ata kanë mundësi të përfitojnë njohuri të reja fetare dhe shkencore. Ai theksoi gjithashtu rëndësinë e sjelljes në vendin tonë të profesorëve dhe ekspertëve të shkencave islame nga Mbretëria e Arabisë Saudite.

Pjesëmarrësit u shprehën të kënaqur me organizimin e seminarit, duke theksuar se aktivitete të tilla janë të rëndësishme jo vetëm për përvetësimin e njohurive të reja, por edhe për forcimin e bashkëpunimit ndërmjet imamëve të myftinive të ndryshme të BFI-së.

Ky seminar shënoi gjithashtu një rast të veçantë, pasi imamët e myftinive të Kërçovës, Dibrës dhe Prilepit patën mundësinë që për herë të parë të jenë së bashku në një seminar të këtij formati.