Agjencia e Ushqimit dhe Veterinarisë (AUV) ka filluar shpërndarjen e 400.000 dozave të vaksinave kundër sëmundjes së lisë së deleve dhe dhive te shoqatat veterinare. Vaksinat janë donacion nga Bashkimi Evropian dhe janë prodhim turk, ndërsa aplikimi i tyre në terren pritet të fillojë të mërkurën.
Nga AUV bëjnë të ditur se paraprakisht kanë marrë rezultatet e analizave laboratorike të realizuara në laboratorët e Fakultetit të Mjekësisë Veterinare.
Testimet kanë konfirmuar cilësinë, rregullsinë mikrobiologjike dhe fuqinë e vaksinave, të cilat, sipas Agjencisë, janë ndër më të mirat për mbrojtjen e bagëtive nga kjo sëmundje.
Fushata e vaksinimit do të zhvillohet në tri faza dhe do të përfshijë gjithsej 3.417 tufa me 438.042 dele dhe dhi në tetë rajonet e vendit.
Në fazën e parë do të vaksinohen bagëtitë në rajonin e Vardarit, Lindor, Juglindor dhe Verilindor. Në këto rajone janë evidentuar 1.859 tufa me gjithsej 193.527 kafshë.
Faza e dytë do të përfshijë rajonin Jugperëndimor, të Pellagonisë, të Pollogut dhe të Shkupit, ku janë regjistruar 1.558 tufa me 244.515 kafshë.
Faza e tretë është paraparë për vaksinim plotësues, me qëllim të arritjes së mbulimit sa më të madh të popullatës së synuar.
Në këtë fazë do të përfshihen qengjat dhe kecat që ndërkohë do të arrijnë moshën e nevojshme për vaksinim, kafshët vaksinimi i të cilave është shtyrë për shkak të gjendjes shëndetësore ose vlerësimit veterinar, si dhe fermat që nuk kanë qenë të qasshme gjatë fushatës fillestare.
Vaksinimi do të kryhet te delet dhe dhitë klinikisht të shëndetshme, në përputhje me udhëzimet për përdorimin e vaksinës dhe vlerësimin e veterinerëve.
Për kafshët shtatzëna, të sëmura dhe ato në periudhën pas lindjes, do të veprohet sipas rekomandimeve veterinare dhe vlerësimit të rrezikut.
Nga fillimi i këtij viti e deri më tani, Agjencia e Ushqimit dhe Veterinarisë ka regjistruar 115 vatra të lisë së deleve dhe dhive.
Si pasojë e sëmundjes kanë ngordhur 875 kafshë, ndërsa 9.359 të tjera janë asgjësuar në mënyrë të padëmshme, sipas protokolleve veterinare.
Me fillimin e fushatës së vaksinimit synohet të parandalohet përhapja e mëtejshme e sëmundjes dhe të mbrohet fondi blegtoral në vend.
