TV LIVE Radio
Nga Vendi
17 November 2026
LSDM: Mickoski dhe Slavevski planifikojnë ta shesin Alta Bankën dy herë më lirë për të fshehur llogaritë dhe transaksionet

Partia opozitare maqedonase LSDM ka akuzuar kryeministrin Hristijan Mickoski dhe guvernatorin e Bankës Popullore, Trajko Slavevski, se po planifikojnë shitjen e Alta Bankës me një çmim shumë më të ulët, me qëllim të fshehjes së llogarive dhe transaksioneve të saj.

Akuzat i ka bërë Maja Borozan nga LSDM-ja, e cila pretendon se Mickoski dhe Slavevski janë përgjegjës për sjelljen e Alta Bankës në Maqedoninë e Veriut dhe për situatën e krijuar rreth saj.

“Mickoski dhe Trajko Slavevski e sollën bankën kriminale Alta në Maqedoni. Tani qytetarët nuk mund të kenë qasje në paratë e tyre, pensionistët nuk mund t’i marrin pensionet, ndërsa është vënë në rrezik edhe sistemi bankar”, deklaroi Borozan.

Ajo bëri të ditur se LSDM-ja ka paraqitur kallëzime penale lidhur me këtë rast, por sipas saj, Prokuroria ende nuk ka reaguar.

Borozan ngriti dyshime se po lihet qëllimisht kohë për të mbuluar rastin, duke pretenduar se paralajmërimi për shitjen e bankës në bursë mund të çojë në zhvlerësimin e saj.

“Mickoski dhe Slavevski planifikojnë ta japin të zhvlerësuar, vetëm për të fshehur llogaritë dhe transaksionet. Sipas modelit, fillimisht të mos paraqitet asnjë blerës dhe në fund të shitet pothuajse falas”, deklaroi ajo.

Përgjegjësinë për situatën e krijuar rreth bankës, Borozan ia atribuoi guvernatorit Slavevski. Sipas saj, deklaratat fillestare të Bankës Popullore se gjithçka ishte në rregull, të pasuara nga vendimi për vendosjen e administrimit të detyruar, kanë shkaktuar panik te qytetarët.

Ajo gjithashtu kritikoi kallëzimet penale të paraqitura nga Mickoski dhe Slavevski kundër LSDM-së, duke pretenduar se përmes tyre po tentohet të zhvendoset përgjegjësia për krizën.

Në fund, Borozan e cilësoi Alta Bankën si pjesë të një rrjeti kriminal që, sipas saj, lidhet me presidentin serb Aleksandar Vuçiq dhe rrethin e tij politik.

“Alta Banka është bërthama e oktapodit kriminal të Vuçiqit, ku Hristijan Mickoski dhe VMRO-ja janë njëri nga krahët. Macura është bankieri i tyre personal. Prandaj po nguten. E vërteta po del në shesh. Banda do të japë përgjegjësi”, përfundoi Borozan.

Sqarim: Pretendimet për përfshirje në veprimtari kriminale, fshehje transaksionesh dhe zhvlerësim të qëllimshëm të bankës janë akuza të përfaqësueses së LSDM-së dhe nuk paraqiten si fakte të vërtetuara. Flaka



Të ndryshme
Më shumë

Radio Uskana - LIVE